Mitoaldia jaialdiaren hirugarren edizioa egingo dute Ataunen uztailaren 5etik 13ra

Ekimenaren kartela./Barandiaran Museoa
Ekimenaren kartela. / Barandiaran Museoa

Ataun euskal mitologiaren erreferentzia gisa irmotzea da Jeltilbaratza Kultur Elkartea eta Barandiaran Museoa antolatzaileen helburua

El Diario Vasco
EL DIARIO VASCO

Ataun Euskal Herriko mitologiaren erreferentzia nagusi izan dadin antolatu dute 3. Mitoaldia, uztailaren 5etik 13ra. Iñaki Perurenaren zein Joseba Aurkenerenaren hitzaldiak, Ataungo mitologia-gune esanguratsuenetatik ibilaldia Jon Aizpuruaren eskutik, udalekuetako taldeentzat jarduera bereziak, ipuin kontaketa antzeztua eta Gau Ibilaldi Mitologikoa ikuskizuna dira aurtengo ekitaldia osatzen duten jarduerak.

Mitologia, ipuin edo kontu fantastiko sorta ez ezik, errealitatea esplikatzen duten argibideen multzoa da. Bizimodua arautzeko balio ez duenean baizik ez da bilakatzen mitologia kontu edo ipuin fantastiko bilduma, baina, orduan ere, ematen duen informazioa aintzat hartzeko modukoa da. Izan ere, beste azalpenik ezean, gertakari naturalei aurre egiteko nahiz euren buruak lasaitzeko, mitoak herritarrei ingurunea ulertzen lagundu dien lanabesa izan dira mendeetan zehar.

Ataunen Joxe Migel Barandiaranek lan handia egin zuen mitologiaren transmisio soka eten ez zedin. Zehazki, ahozko tradizioa paperean bilduz altxorra utzi zion herriari eta horri esker, esate baterako, Jentilen Etorrera edota Gau Ibilaldi Mitologikoa ospatuz, Ataungo hainbat txoko eta istorio mitologiko ezagutarazten dira urtero herritarren zein bisitarien artean Jentilbaratza Kultur Elkartearen eskutik.

Aipatu jarduerak antolatzen dituen Jentilbaratza Kultur Elkartearen eta Barandiaran Museoaren arteko lankidetza ez da gaurkoa; urteak daramatzate elkarlanean, beti ere euskal ondarearen berrabiltzean, ingurumen sentikortzearen sustapenean eta Ataunen osoko garapenean ekarpentxoa egiteko itxaropenarekin. Lankidetza giro horri eusteko eta aipatu helburuak aitzineratzen jarraitzeko MITOALDIA izeneko ekimen sendoa jarri zuten abian duela hiru urte Jentilbaratza Kultur Elkarteak eta Barandiaran Museoak.