Margolanak Xavier Álvarez de Eulateren omenez

Xavier Álvarez de Eulate Frantziskotarrak egin zituen Arantzazuko basilikako beirateak/
Xavier Álvarez de Eulate Frantziskotarrak egin zituen Arantzazuko basilikako beirateak

Datorren irailaren 15ean, Xavier Álvarez de Eulate Frantziskotarraren omenezko egitarauaren baitan, pintura lehiaketa egingo dute

Arantzazuko Basilikako beirateen egileari, Xavier Álvarez de Eulateri, bere ibilbide artistikoa eta egindako lana omentzea izango da datorren irailaren 15ean, larunbatean, egingo duten pintura-lehiaketaren xede nagusia. Antolatzaileek, Arantzazuko Adiskideak elkarteak eta Arantzazu Gaur Fundazioak, seigarrengoz antolatu dute ekimena.

Frantziskotarren ordenak eman duen artista onenetarikoa da Xavier Álvarez de Eulate, eta hari gorazarre egiteko eta bere ospea zabaltzeko Arantzazu azken urteetan antolatzen ari den ekintza-programa zabalaren barruan, besteak beste, lehiaketa hau kokatzen da. Burutu diren beste ekimenen artean daude, esaterako, Maushaus arkitektura-estudioak Arantzazuko Gandiaga Topagunea kultur zentroan eskaini dituen haurrentzako lantegiak. Zehazki, Xavier Álvarez de Eulatek bere lanetan kolorea eta argia nola erabili dituen landu dituzte. Eta ildo berean, aipatzekoak dira Aste Santua dela-eta Donostiako Santa Maria Basilikan ikusgai izan diren erakusketa tematikoak.

'Xavier Álvarez de Eulate' pintura-lehiaketako VI. ekitaldian nahi duen orok parte har dezake, hiru kategoria hauetako batean: helduena (16 urtetik gorakoena), gaztetxoena (12 eta 16 urte bitartekoena) eta haurrena (11 urte artekoena). Lehiakideek Arantzazuko Santutegiko edozein zoko, paisaia edo monumentu margotu ahal izango dute, eta teknika librean; baldintza, lan bakarra aurkeztea.

Zigilatzea eta izen-ematea, goizeko 10:00etatik 12:00etara, Arantzazuko Gandiaga Topagunea kultur zentroan egingo dira. Eta obrak, arratsaldean, 16:00etatik 17:00etara entregatu beharko dira aipatutako leku berean, inolako sinadurarik gabe. Epaimahaia Edorta Kortadi arte-kritikoak, Xabier Egaña eta Luis Lascurain pintoreek eta Leire Fernández Arte Ederretan doktoreak osatuko dute. Haiek erabakiko dute nortzuk izango diren irabazleak: helduen kategoriako lehen saridunak 1.500€ eta diploma irabaziko ditu; bigarrenak, 750€ eta diploma; eta hirugarrenak, 400€ eta diploma. Gaztetxoen eta haurren kategorietako lehen eta bigarren irabazleek, pintura-material sorta bana eskuratuko dute.

Pintura-lehiaketan saritutako koadroekin eta lehiaketara aurkeztutako besteekin erakusketa antolatuko da Gandiaga Topagunean bertan urriaren 20tik azaroaren 11ra bitartean. Erakusketa ikusgai izango da asteburuetan eta jai-egunetan, 11:00etatik 14:00etara, eta sarrera doakoa izango da. Arantzazuko Adiskideak elkarteak eta Arantzazu Gaur Fundazioak, pintura zale guztiei lehiaketan parte hartzeko edo ikusle bezala hurbiltzeko gonbita zabaldu nahi die.

Temas

Euskera

Contenido Patrocinado

Fotos

Vídeos