Maiatzaren 31n amaituko da proposamenak bidaltzeko epea

Maiatzaren 31n amaituko da Elkar fundazioak eta Euskal kultur erakundeak Iparraldeko idazleak euskaraz idaztera lehiatzeko asmoz antolatzen den EKE-Elkar literatura bekara proposamenak bidaltzeko epea. Bi urterik behin antolatua, epaimahaiak hautatutako proposamenak 6.000 euroko diru kopurua jasoko du. Era berean, literatur-generoa deialdi bakoitzean aldatzen denez, oraingoan helduentzako narrazioa da (eleberria, edo ipuin bilduma izan daiteke).

Azaldu beharko dira landu nahi duen proiektuaren aipamen laburra, 2-4 orrialdekoa, ezaugarri nagusiak agertuz, hala nola, luzera, estiloa, zergatiak, iturriak, egitura edota helburua. Baita ere, obraren erakusgai edo lagina, 4-5 orrialdekoa.

EKE-Elkar literatura beka Ipar Euskal Herriko euskarazko literatura sorkuntza sostengatzeko asmoz bultzatu zuten 2021ean Euskal kultur erakundeak eta Elkar fundazioak. Ekimenk honek 2000. urtean sortu Gazteluma saria ordezkatzen du eta hura bezala bi urtetik behin antolatzen da ipar Euskal Herriko idazle guztiei zuzendurik.

Lehen ekimenean Adur Larreak irabazi zuen beka eta dirulaguntzarekin 'Lurbinttoko ohoinak' argitaratu zuen, Iparraldean, Frantziako iraultza bukatu berritan girotutako komiki historikoa. Bi urte beranduago, literatur bekaren 2023ko deialdia Idoia Rodriguez Mondragonek irabazi zuen Mirentxu Ibargaraik, Mayi Saint Estebenek, eta Marie-Andrée Ouretek osatutako epaimahaiak hala erabakita eta duela egun gutxi aurkeztu zuen Baionan haren emaitza, 'Euritan', nerabeei zuzendutako eleberria. Egunkari moduan, Euri izeneko hamabost urteko gazte baten bizipenak kontatzen digu idazleak.