Bi liburu berri Xaguxar bilduman

Kaleratu berri dituzten bi ipuinak/DV
Kaleratu berri dituzten bi ipuinak / DV

ntton Kazabon eta Alex Orberen 'Lehenengo musuaren zain' eta Alaine Agirre, Xabier Mendiguren eta Belatzen 'Frankitxoren maskota txikia' kaleratu berri ditu Elkar etxeak

DVDonostia

Elkar argitaletxeak bi ale gehitu ditu Xaguxar bildumara: Antton Kazabon eta Alex Orberen 'Lehenengo musuaren zain' eta bildumaren baitako Munstro Txikien liburu sortako azkena, Alaine Agirre, Xabier Mendiguren eta Belatzen 'Frankitxoren maskota txikia'. Zortzi eta hamar urte bitartekoei bideratutakoak dira biak ala biak.

Haur literatur bilduma da Xaguxar; liburuki guztiak dira zortzi eta hamabi urte arteko gaztetxoentzako. Askotariko gaiak jorratu ohi dituzte istorio horietan. Oraingoan ere, kaleratutako bi liburuak desberdinak dira eduki eta forma aldetik, nahiz eta biek duten xedea irakurterrazak eta dibertigarriak izatekoa.

Munstro Txikiak azpi-bildumako 'Frankitxoren maskota berria' liburuan, bost lagun dira Munstroen Eskolako ikasleak: Hagintxo, Mamutxo, Sorgintxo, Frankitxo eta Neskaotso. Haien irakaslea da, bestalde, Andereño Herminia.

Frankitxoren urtebetetzerako gurasoek maskota berezi bat egingo diote: herensuge txiki biomekaniko bat. Laborategian ondo joango dira eraikitze-lanak, baina azken orduko ezusteko batek hankaz gora botako du dena, herensuge txiki hori hazi eta hazi egingo baita, hiri osoa arriskuan jartzeraino. Agirre eta Mendigurenek lau eskutara idatzitako liburua da, eta munstroen bidez, pertsonen arteko desberdintasunak gorpuztu nahi izan dituzte, besteen begietan, maiz, «desberdina izateak egiten dituelako izaki batzuk munstro».

Orduan, azaldu dute, «izaki aparteko horiek elkartu egiten dira, batak besteari laguntzen diote eta elkar babesten dute. Eta hortik aurrera, zeure parean ez duzu ikusten munstro bat, baizik eta lagun bat, bere ohiturak, nortasuna eta berezitasunak dituena, zeuk ere zeureak dituzun bezala». Lagunartekotasun horretan oinarrituta sortu dute Belatzek ilustratutako istorioa.

Umetan «txoratu egiten ninduen munstroak marrazteak», azaldu du artistak, eta horregatik, hain zuzen, «ibilbideko hasiera gogoratzeko zortea» izan du istorioa marraztean.

Etxe-bloke bizi-bizia

Desberdina da 'Lehenengo musuaren zain' ipuina. Hasteko, desberdina da liburuak jorratutako gai nagusia, eta bestetik, desberdina da, baita ere, liburuaren beraren egitura. Aimar da Kazabonek idatzitako istorioko protagonista, baina pertsonaia ugari ditu.

Hurrengoa dio sinopsiak: Aimar bizi den etxe-blokea bizi-bizia da. Aimar askotan arduratzen da Maria eta Junkal alabaren katua zaintzeaz, gazte kuadrilla bat ere bizi da eraikinean, Jaione eta Leire bikoteak aurki ekarriko du umetxo bat Txinatik, eta Mikel eta Argiñe neba-arrebak ere Aimarren egunerokoan oso presente daude. Etxe horietako askotan sartzeko aukera ematen du iburuak.

Interes berezia du, ordea, Uxue bizilagunarekiko. Beregana hurbiltzeko, Emilio katua oso lagungarri izango zaio.

Alex Orbek egin ditu ilustrazioak. Besteak beste, berak ilustratuak dira ondorengo argitalpen hauek: 'Amaia Lapitzen abenturak' (2013), 'Labarreko itsasargia', (2013), 'Maite zaitut Nadia', (2012) edo 'Hiru sopranoak', (2015).

Temas

Euskera