Kalean dira Donostia Hiria Kutxa sariak irabazi zituzten lanak

Kalean dira Donostia Hiria Kutxa sariak irabazi zituzten lanak

Euskarazko lan sarituak Oier Guillanen 'Aire ikusezina' eta Alexander Martinez Iturriaren 'Iraumen' ipuin bilduma izan ziren

Donostia Hiria Kutxa Literatura sariak iazko irailean iragarri ziren, eta abenduan eman. Saritutako lanak, berriz, 2019ko urtarrilean eman ditu argitara egoitza Sevillan duen Algaida argitaletxeak. Irakurtzeko moduan daude, hortaz, gaztelaniazko eta euskarazko ipuin irabazleak, baina hizkuntza bietako antzezlanak ere. Etxe hori ari da hain zuzen azken urteetan saritutako lanak argitaratzen.

Euskarazko lanei dagokienez, Alexander Martinez Iturriaren 'Iraumen' ipuin-bilduma aukeratu zuen epaimahaiak irabazle aurkeztu ziren bederatzi lanen artean. Saritua, 1989an Irunen jaiotakoa eta Arkitektura ikasketak egindakoa, orain arte ezer argitaratu gabea da. Paperean ez ezik e-book gisa ere argitaratu dute hemeretzi ipuinez osatutako liburua, egilearen aurrenekoa, munduan zehar barreiatutako tokiz osatutako 'euskal metropolia' dakarkiguna, argitaletxearen laburpenaren arabera.

Ezin horrelakorik esan antzerki alorreko saria irabazi zuen Oier Guillani buruz, aski ezaguna baita antzerkigintzan. Saria eman zion eta argitaratu berri dioten 'Aire ikusezina' obraz gain -jasaotako hemeretzi lanen artean aukeratu zuen epaimahaiak-, beste lau ditu argitaratuak. Hiru poesia liburu eta eleberri bat ere baditu argitaratuta Guillanek. «Misterio giro batek biltzen du 'Aire ikusezina' antzezlana, baina batez ere, pertsonekiko elkartasunak: ikusezin izateari utzi nahi dioten pertsonekiko elkartasunak», dio liburuaren azalak Oier Guillanen lanari buruz.

Gaztelaniazko saria jaso zuten liburuei dagokienez, Matias Candeira de Andresen 'Moebius' kontakizun bilduma eta Fernando Trias de Besen 'El trámite' argitaratu dituzte.

Temas

Euskera
 

Fotos

Vídeos