Gai eternalen inguruan ari da Linazasoro, Horazio bezala

Balea Zuriak argitaratu dio liburua Linazasorori./MICHELENA
Balea Zuriak argitaratu dio liburua Linazasorori. / MICHELENA

Tolosako idazleak beste olerki liburu bat plazaratu du. «Gaur egun, poesia argitaratzea heroizidade bat da», esan du

FELIX IBARGUTXI

Karlos Linazasorok beste olerki liburu bat plazaratu du: 'Lurra bere erro gorrira'. Hain zuzen ere, lau poetak sortutako argitaletxe baten bidez kaleratu du, Balea Zuria, alegia. Tolosako olerkariak etxe horren meritua azpimarratu du: «Gaur egun poesia argitaratzea Herkulesen langintzetako bat da, heroizidade bat. Argitaletxe gehienek poesia alboratuta daukaten honetan, Balea Zuriak Eusko Jaurlaritzaren laguntza merezi du».

Balea Zuriak ez du aurten Eusko Jaurlaritzaren laguntzarik jaso, parametroen barruan sartzen ez delako; izan ere, iaz jaioa izanik, eta urtean bizpahiru liburu liburu plazaratzeko asmoa duenez, oraindik katalogo txikia dauka, eta gutxieneko katalogo bat edukitzea omen da laguntza publikoa jasotzeko baldintzetako bat. Felipe Juaristi, Aritz Gorrotxategi, Pello Otxoteko eta Juan Ramon Makuso dira argitaletxearen sortzaileak eta, azkeneko honek azaldu duenez, Linazasororen liburuaren aurkezpenekoan, espero dute hurrengo urtean diru-laguntza eskuratzea.

«Horazio berrirakurtzen egon naiz –adierazi du Linazasorok–. Eta ikusi dut Kristo aurreko 8. urtean jaio zen poeta hark eta biok gai berberak erabiltzen ditugula. Gai eternalak dira, adibidez 'beatus ille' delakoa. 'Carpe diem' delakoa da nire beste gaietako bat, eta hori ere oso gai horaziarra dugu. Gai eternalak dira, mendea joan eta mendea etorri hor jarraitzen dutenak».

Linazasorok ohitura duen moduan, maitasuna da liburu honetan sarri agertzen den beste gai bat. «Maitasuna da motorrik handiena. Maitasunaren minek eta zorionez jardun naiz». Eta heriotzaren gaia ere hor dago: «Pozik gaude zoriontsuak izan ginelako, baina denbora badoa eta heriotza hor dago, beldurra eta angustia sentitzen dugularik».

Tolosar poetaren liburu guztietan naturak presentzia handia du, eta honetan ere bai. «Ukitu panteista bat badute nire olerkiek. Transzendentzia bat lortu nahia ere hor dago. Eta misterioa. Ez naiz konformatzen ikusten dudanarekin. Beste zerbait ere badago, eta horra iristeko bidea da niretzat poesia».

«Poeta batek egia bilatu behar du, bere egia –gaineratu du–. Horretan zintzoa izan behar du. Hala ere, poeta izateak ez dakar berekin zintzotasuna, poeta izateak ez dizu 'per se' ontasuna ematen».

Liburuaren aurkezpen ekitaldian poesiaren apologia egin du Tolosako idazleak: «Nobelaren tirania dago. Ipuinekin ere, kontuz argitaletxeari zer eskaintzen diozun. Beti esan izan da poesia bukatuko dela, irakurle gutxi dituela, baina hainbeste denbora iraun duen genero bakarra da. Ez dakit zergatik; musikarekin lotura daukalako beharbada».

Eta Juan Ramon Makuso editorearen hitzak: «Hemen, inportanteena da esatea poesia ez dela hil».

Temas

Euskera
 

Fotos

Vídeos