Beste Altzoko Handi bat, garaikide eta poetiko xamarra

Koldo Izagirre, Karmele Gorroño eta Irene Irureta, atzo Donostiako Konstituzio Enparantzan. /
Koldo Izagirre, Karmele Gorroño eta Irene Irureta, atzo Donostiako Konstituzio Enparantzan.

Koldo Izagirrek eta Irrimarra bikote sortzaileak bi album egin dituzte, modu guztiz askean jokatuz

FELIX IBARGUTXI

Altzoko Handiari buruzko bi album grafiko plazaratu ditu Erein etxeak, Koldo Izagirreren testua eta Irrimarraren marrazkiak dutenak. 'Altzoko Handia eta Kutixiren gezurrak' eta 'Altzoko Handia eta Kutixiren pianoa' dute izenburu eta pertsonaia historiko haren bertsio guztiz librea eskaintzen dute. Azal gogorreko albumak dira, bata nahiz bestea 32 orrialdekoak, eta hamabosna euroan daude salgai.

Urteak dira Koldo Izagirre idazlea Migel Joakin Eleizegi (1818-1861) Altzoko Handiaren inguruan lanean hasi zela. Hasteko, haur-opera baterako testuak egin zituen, David Azurza musikari tolosarrak eskatuta. Gero, Altzoko Udalak eskatuta, Handiari buruzko zirkuitu baterako argibide-panelak prestatu zituen, alde grafikoaz Juanba Berasategi zena arduratu zelarik. Ondoren, Lourdes Murua Altzoko zinegotziak album grafiko batzuk egitea proposatu zion, eta idazleak halaxe ekin zion orain plazaratu den emaitzari.

Fito Rodriguezek esanda, Irrimarrarekin harremanetan jarri zen. Karmele Gorroño eta Irene Iruretak osatutako marrazkilari bikote honek guztiz aldatu zuen hasieran Izagirrek zerabilen ikusmoldea, eta azkenean poesia aldera egin zuen. «Lehenbizi, narrazio klasiko bat egin nuen. Pasatu nien testua bi marrazkilari hauei, albumaren zirriborroa erakutsi zidaten eta, marrazki haiek ikustean, segituan konturatu nintzen erabat aldatu behar nuela testua. Orain ez dago narraziorik, soilik solas batzuk, errimatuak, onomatopeia batzuk eta kopla eta kantu zenbait. Sekulako lana eskatu zidan. Nahikoa baita hitz desegoki bat orrialde dotore hauek izorratzeko», adiearzi du Izagirrek aurkezpen ekitaldian.

Altzoko Handiaren bertsio guztiz askea egin du Izagirrek. Gaur egungo garaira ekarri du, eta Handiaren aldamenean Kutixi izeneko neskatila bihurria ipini du. Haren aldean, Handia pertsonaia apal eta sentibera da, inuxente xamarra, eta inpresio hori areagotu egiten da marrazkilariek emandako trataerarekin; posturekin, adibidez.

Umeentzako ez ezik, helduentzat ere erakargarriak gertatuko omen dira album koloretsuok. Baina helduek handikap handi bat daukate, Izagirrek aurkezpen-ekitaldian azaldu duenez: «Guk galdu egin dugu albumak sentitzeko gaitasuna. Izan genuen eskolaren ondorioz, moztadea daukagu, atrofiatuta gaude. Albuma zabaldu eta hasten gara pentsatzen zer ulertuko dugun; galdu dugu umeek daukaten fantaseatzeko eta gozatzeko gaitasuna».

Irrimarra bikote sortzailea Karmele Gorroño (Galdakao) eta Irene Iruretak (Zumaia) osatzen dute. Biak Arte Ederretan lizentziatuak (EHU), unibertsitatean bertan hasi ziren elkarlanean.

Temas

Euskera

Contenido Patrocinado

Fotos

Vídeos