'Amets alokatuak', Harkaitz Cano eta Iñaki Holgadoren laugarrena

Dani Fano, Harkaitz Cani, Iñaki Holgado eta Koldo Tellitu./LUSA
Dani Fano, Harkaitz Cani, Iñaki Holgado eta Koldo Tellitu. / LUSA

Donostian aurkeztu den komiki bilduma Ikastolen Elkarteak eta Xabiroi aldizkariak euskal komigintza sustatzeko elkarrekin argitaratu duten hamabigarrena da

M. IMAZ

2017ko ekainean heldu zen aurrenekoz Xabiroi komiki aldizkariaren irakurleen aurrera 'Amets alokatuak' saila. Elkarrekin ari ziren berriro lanean, 'Piztia otzana', 'Zebra efektua' eta 'Museo bilduma' sailetan bezala, Harkaitz Cano eta Iñaki Holgado. 'Amets alokatuak' sailak ere amaitu zuen aldizkari barruko atalez ataleko ibilbidea eta orain, Xabiroik eta Ikastolen Elkarteak euskarazko komigintza sustatzeko asmoz abiarazi zuten proiektuaren baitan egin ohi duten bezala, bigarren bizialdia hasi du, album formatuarekin.

Egile biak, Ikastolen Elkarteko lehendakari Koldo Tellitu eta Xabiroi aldizkariko zuzendari Dani Fano tartean zirela aurkeztu da albuma Donostiako Tobacco Days liburudendan. Egileek adierazi dutenez, «etorkizun hurbil batean, jendeak bere gau horretako ametsak alokatuko ditu, orain hoteleko gela bat hartzen duenak bezala…». Etorkizunean baino zehazkiago, giro retrofuturista batean dago kokatua kontakizuna, non jendeak besteen ametsak kontsumitzen dituen, haiei erauzi eta moldatu ostean. Mediku zientzialari bat du protagonista, Zorba izenekoa, eta Frankenstein moduko doktore bat da.

Xabiroi komiki aldizkariak argitaratu duen hamabigarren lana da 'Amets alokatuak'. Lehenbizikoa egin zutenetik, urtero argitaratu dira aurretik Xabiroin atalka publikatu diren istorioen bilduma bana. Eta horretan jarraitu nahi dute, Ikastolen Elkarteko lehendakari Koldo Tellituk azaldu duen gisan: «Euskarazko komikigintzak pizkundea bizi duela azpimarratu zuten iaz, hedabideetan. Sorkuntza eta argitarapenetan, eta haien kalitatean, gora doala ezin uka. Ikastolen Elkartean pozik gaude hori horrela izateaz, eta pozik gaude horretan gure alea ipini izanaz, Xabiroi proiektua martxan jarri izanaz eta hura bultzatzeaz, itsasontzi honetako kapitain Dani Fanoren gidaritzapean». Tellituk bezala, komikigintzaren pizkundea nabarmendu du Fanok, eta horretan Xabiroik izan duen eragina ere aipatu du.

Temas

Euskera