Leioako 25. Umore Azokak 100 ikuskizunetik gora eskainiko ditu

Ostegunetik igandera izango den Leioako Umore Azokaren 25. edizioa antzerki, dantza, zirku eta musikako 100 ikuskizun baino gehiago eskainiko ditu Euskal Herritik eta munduko hainbat herrialdetatik heldutako 50 konpainiaren eskutik. Horien artean gazteen interesa bereziki piztuko duten proposamenak indartu nahi izan ditu antolakuntzak, hartarako «artea kalean modu zuzen eta parte hartzailean bizitzera» gonbidatuz.

Horrela, gazteentzako eskaintza horien artean azpimarratzekoak dira 'Artifiziala', Flu Teatro konpainiaren lana, adimen artifizialari buruzko hausnarketa umorearen bidez egiten duena; 'Famulus 4.0', Iron Skulls Co-ren eskutik, dantza urbanoa eta teknologia uztartzen dituen ikuskizuna, non txakur robot bat dantza emanaldiaren parte den.

Bestalde, emozioetara zuzenean heltzen duten ikuskizunak ere izango dira, hala nola 'Sinsolo', Faltan 7 konpainiaren lana, arrisku emozionala eta oreka oholtzan uztartzen dituena zirkuko tekniken bidez, edota 'Revolución', Teatro Sobre Ruedas-en proposamen ibiltaria, irisgarritasunaren inguruan hausnartzera gonbidatzen du zirkuaren, umorearen eta musikaren bidez.

Gainera, Circuspunto-k 'Somos' eskainiko du, esanahiz beteriko zirku garaikidea, eta Company Midnight konpainiak 'US', labanak protagonista dituen dantza pieza ikusgarria.

Familientzako programazioak ere toki nabarmena izango du Umore Azokan, elkarrekin gozatzeko pentsatutako muntaketekin, Ameztu Antzerkia taldearen 'Kay robot', Erre Produkzioak-en 'Superheroiak', Xabi Larrearen 'Baboom' eta Zirkun Zirko-ren 'Loratzen' lanekin.