'Lasterbidol' kanpaina aurkeztu du Donostiako Udalak

'Lasterbidol' kanpaina aurkeztu du Donostiako Udalak
Jose Usoz / DV

Auto pilaketak ekiditeko hiritarrak sentsibilizatu nahi ditu ekimenak

El Diario Vasco
EL DIARIO VASCO

Donostiako Udalak 'Lasterbidol' kanpaina jarri du abian hiritarrak sentsibilizatzeko eta kontzientziatzeko asmoz, uda honetan hiriko kaleetan autoek sor ditzaketen auto pilaketak ekiditeko. Horrela, umore ukitu batekin, kanpainaren «leitmotiv zentrala» izango da «Donostiako kaleek arnasa hobeto har dezaten» eta sei erremedio proposatu dira bertan uda giroan sortzen den «ohiko gaixotasun hau» saihesteko.

Pilar Arana Donostiako Udaleko Mugikortasun eta Garraioko zinegotziak azaldu duenez, kanpainaren helburu nagusia hiritarrak ibilgailu pribatuak gutxiago erabiltzearen inguruan sentsibilizatzea da. Xedea autoen erabilera gutxitzea da, batez ere, hiriaren erdigunean, eta, horrela, mugikortasuna erraztu.

Kanpainaren baitan, farmazia bat jarriko da Bretxako azokaren plazan. Bertan, aste osoan zehar 8.000 prospektu banatuko dira sei erremediorekin, edonork kanpainaren nondik norakoak jakiteko. Gainera, botika horren berri emango da hedabideetan eta sare sozialetan iragarki desberdinen bitartez.

Sei erremedioen artean, batez ere auto pilaketak saihesteko, oinez ibiltzea eta garraio publikoa erabiltzea daude. Jarraibide hauekin, pilaketak saihesteaz gain, «Donostia beste modu batean gozatzeko eta sentitzeko aukera» eskaintzen da, oinez, bizikletaz, trenez eta autobusez. Horrela, autoak dakartzan buruhauste eta arazo guztiez ahaztu ahal izango dira gidariak eta oinezkoak.

Pilar Aranak adierazi du udan zehar Donostiak ohi baino bisitari gehiago dituela eta, horren ondorioz, kaleetan dabiltzan kotxe kopurua ere askoz ere handiagoa dela. «Egoera honen aurrean, Donostiako kaleek arnasa hobeto har dezaten aurkezten dugu kanpaina hau. Lasterbidolek uda honetan trafiko arazoei erremedio ziur eta eraginkor bat eman nahi dio», azaldu du.