Kirolene film laburren lehiaketa egingo dute asteazkenetik ostiralera

'Pastoreak' filma ikusi ahalko da, besteak beste/
'Pastoreak' filma ikusi ahalko da, besteak beste

Aurten 29 film labur aurkeztu dira lehiaketara, iaz baino hiru gehiago. Maiatzaren 1tik 3ra, Durangon egingo dituzte eskia, snowboarda, mendia, ur kirolak eta naturan eginiko beste kirol batzuen inguruko ikus-entzunezkoen proiekzioak

El Diario Vasco
EL DIARIO VASCODonostia

Kirolene Film Fest esparru naturalean egiten diren kirolen film laburren bigarren lehiaketa ospatuko da asteazkenetik ostiralera, hau da, maiatzaren 1tik 3ra, Durangon (Bizkaia), eta hiru saio eskainiko ditu San Agustin Kultur Gunean. Nazioarte mailan 13 sari jaso dituen 'A land shaped by women' filmarekin ekingo diote jaialdiari, lehiaketatik kanpo. Anne Flore-Marxer lanaren egile eta snowboardeko munduko txapeldun ohia Durangon izango da ikusleen galderei erantzuteko.

Filmak emakumezkoen ikuspuntua eskaintzen du gizonezkoak nagusi izan diren surf eta snowboard kirolen praktikan. Feminismoa eta kirola uztartzeko, protagonista Islandiaraino doa, «genero berdintasunean eredugarri izan den gizartea eta paisaia paregabeak gordetzen dituen herrialdera».

Ostegunean, maiatzaren 2an, Durangaldean ekoitzitako bi dokumental eskainiko dira, horiek ere lehiaketatik kanpo. 'Pastoreak' dokumentalean, egungo gizarte globalizatuan artzain izatea erabaki duten andre-gizonak dira protagonista, eta 'Tor' lanean, munduko ultratrail lasterketa gogorrenetarikoan Silvia Trigueros korrikalari bizkaitarrak bere gaitasun fisikoa eta psikikoa muturreraino eraman duen bizi esperientzia azaltzen du.

Ostiralean, maiatzaren 3an, Kirolene Film Fest irabazi duten film laburren egileei sariak banatzeko ekitaldia egingo da. Aurten 29 film labur aurkeztu dira lehiaketara, iaz baino hiru gahiago, «eta horrek esan nahi du Kirolene Film Fest sendotu eta erreferente bihurtzen ari dela kirolarien topagune gisa».

Horrela, eskia, snowboarda, mendia, ur kirolak eta naturan eginiko beste kirol batzuen inguruko film laburrak sarituko dira. Aipamen berezia jasoko dute ezgaitasuna duten kirolarien inklusioari buruzko film laburrik onenak eta euskaraz egindako onenak.

Gainera, aurten lehenengoz, emakumezkoek egindako film laburrik onenak sarituko dira. Orain arte gizonezkoen esparru izan diren abentura kirolean emakumezkoen parte hartzea bultzatu nahi du Kirolene Film Fest-ek sari honekin, eta Izaskun Landaida Emakundeko zuzendariak emango du. Jaialdiaren hiru saioak San Agustin Kultur Gunean izango dira, arratsaldeko 19:30ean.

Temas

Euskera