Japoniar erako ipuin bat sortuko du Mattinek Nekatoenean

Iñaki Martiarena, artxiboko argazkian, Zumaian 'Arrain nahastua' erakusketa prestatzen ari zela,/S. UTRERA
Iñaki Martiarena, artxiboko argazkian, Zumaian 'Arrain nahastua' erakusketa prestatzen ari zela, / S. UTRERA

Iñaki Martiarena donostiarraren proposamena aukeratu dute Nekatoeneako idazle egonaldiaren zortzigarren ediziorako

Zortzigarren ediziora iritsi da Euskal Kultur Erakundeak, Euskal Idazleen Elkarteak eta Euskal Itsasbazterreko IEZIren sorkuntza arloa den Nekatoeneak elkarlanean antolatzen duten idazle egonaldia. Horren baitan, sortzaile batek hilabetez gara dezake bere proiektua Hendaiako Abadia eremuan kokatutako artisten etxean.

2018an Iñaki Martiarena 'Mattin' sortzaile donostiarrak izango du aukera hori udazkenean, bere proposamena hautatu baitute. Zabaldu duten oharrean nabarmendu duten bezala, «berriro ere euskal sortzaile bat gerturatuko da Nekatoeneara, udazkenean hilabeteko egonaldia egitera, bertan euskal literatura indartzeko beste urrats bat emanez».

Honakoa diote hautaketaz: «Aurten idazle eta idazketa mota ezberdinak izan ditugu hautagaien artean, zein bestea baina interesagarriago, hautu zaila izan dugu. Horiek guzien artean, Iñaki Martiarena – Mattin sortzailea izanen da Nekatoenean instalatuko dena, azaroaren 5etik aurrera».

Bertan egingo duen egonaldian kamishibai ipuin bat idatzi eta marrazteko egitasmoa proposatu du. «Kamishibaia, Japonian bereziki 1945. urtearen ondoren garatu eta hedatu zen teknika narratibo bat da. Hauxe da bere ezaugarri nagusia: 'butaia' edo egurrezko antzokia erabiliz, narratzaileak testua irakurri egiten du, ozenki, eta bitartean ilustrazioa erakusten dio publikoari», argitu dute.

30tik gora liburutan zein erakusketa eta tailer ugaritan parte hartu duen Mattinek Nekatoenea inguruko elementuak baliatuko ditu kontakizun honetan: sagastia, kaioak, itsasoa ... Izan ere, «ipuin hau naturaren eta bereziki kostaldearen aberastasunaz ohartaraztea baliatuko duela adierazi du. Abiapundu hori aurreikusten badu ere, egileak aipatu du egonaldian bertan sortuko diren emozio eta bizipenek ere lekua hartuko dutela kontaketa horretan».

Temas

Euskera

Contenido Patrocinado

Fotos

Vídeos