Hamabigarrena azkena izan du 'Erlea' aldizkariak

Bernardo Atxaga eta Andres Urrutia, despedida kutsua izan duen aurkezpenean./
Bernardo Atxaga eta Andres Urrutia, despedida kutsua izan duen aurkezpenean.

«XXI. mende hasierako euskal sorkuntzaren lagin garrantzitsua da», esan du despedida kutsua izan duen 12. zenbakiaren aurkezpenean Bernardo Atxagak

12 zenbaki. 9 urte. 1.296 orrialde. 376 artikulu. 30 artista. 200dik gora egile... Zenbaki horiekin egin ditu adioak 'Erlea' aldizkariak, Euskaltzaindiak argitaratu eta Bernardo Atxagak zuzendu duen argitalpenak. 2009an abiatu zen proiektua ixten duen 12. zenbakia ostiral honetan aurkeztu da Euskaltzaindiaren Bilboko egoitzan, eta hantxe esan du Atxagak 'Erlea' dela «XXI. mende hasierako euskal sorkuntzaren lagin garrantzitsua«.

2009an, estreinako zenbakia kaleratu zenean, Bernardo Atxagak agindu zuen aldizkari «profesionala» izango zela 'Erlea', zenbaki bakoitzak «atmosfera» jakin bat izango zuela, eta aldizkari guztiek jarraitu izan dute eredu edo lerroburu hori. Andres Urrutia euskaltzainburuak, berriz, azken ia hamar urteotan eginiko ahalegina nabarmendu nahi izan du prentsaurrekoan: «Hasiera-hasieratik, gure asmoa izan zen 'Erlea' euskal kulturako erreferenteetako bat bihurtzea, eta esango nuke lortu dugula, Bernardo, Asun Garikano, Txema Aranaz eta Pamielaren laguntzarekin, izugarrizko lana egin baitute guztiek».

Euskaltzaindiaren mendeurrenaz

Azkena izango den zenbaki honek Euskaltzaindiaren mendeurrenari buruz jarduten du, gehienbat. Euskal akademiaren ehun urteko historian garrantzitsuak izan diren gertaerak eta pertsonaiak erakusten dira, modu hurbil eta, tarteka, harrigarrian. Andres Urrutia euskaltzainburuak azaldu du «hain ezagunak ez diren pasadizoak eta gertaerak» azaltzen direla aldizkarian, eta irakurleak «Euskaltzaindiaren barruak ezagutzeko aukera» izango duela azpimarratu du: «ehun urtetan protagonista izan direnen profil sakonak, tarte horretan gertatutako edozenbat kontu eta jazoera, argazki ezezagun eta harrigarriak...».

Aldizkariaren ohiko atalei ere eusten zaie Jose Antonio Azpilikuetak egindako azala duen 12. zenbakiari. esteak beste, hastapenetako euskaltzainen profilak aletzen dira; gordetako testu batzuk agertu -ETAk euskarari buruz, 1962an-; argazki berriak erakutsi -Gabriel Arestirenak, esaterako-; Ramon Saizarbitoria eta Ibon Sarasolaren arteko hizketaldi mamitsu bat proposatzen da -Miel A. Elustondok egina-; Beatriz Chivite, Hasier Larretxea edo Amaia Iturbideren poemak erakusten dira; Txani Rodriguez eta Garbiñe Ubedaren kontakizunak; liburu iruzkin mamitsuak; Laura Mintegi, Kepa Altonaga, Nora Arbelbide edo Juan Luis Zabalaren testuak; Txema Larreari eginiko gorazarrea...

Aldizkariaren ibilbidea amaitu bada ere, baliteke etorkizunean bestelako jarraipenik izatea. «Aurrerantzean, asmoa litzateke 'Erlea'-ren antologia berezi batzuk argitaratzea. Bat egina daukat. Hori bai, gizarteak inplikatu beharko du horretan, antologia horiek ez baititut plazaratuko tartean eskaera jakin eta serio bat ez badago».

Temas

Euskera

Contenido Patrocinado

Fotos

Vídeos