'Gure Kasa' denboraldi berriarekin itzuliko da, astelehenero

Julen eta Antton Telleriak aurkeztutako saioa bere izpirituari eutsiko dio bigarren denboraldi honetan, eta bereziki, kultura eta kirolari lotutako aurpegi ezagunak gonbidatuko dituzte platora

Datorren astelehenean ekingo dio 'Gure Kasa'k bere bigarren denboraldiari, bere izpirituari eutsiz. Bereziki kultura eta kirolari lotutako aurpegi ezagunak gonbidatuko dituzte platora Julen eta Antton Telleriak. Estreinaldirako, punta puntako gonbidatu bat izango dute: Imanol Agirretxe, urtetan Anoetako ateetako sareak zulatu dituen aurrelari aparta. Duela bi aste futbol profesionala utziko duela iragarri zuen eta datorren larunbatean, Bartzelonaren aurkako partidan, egingo diote agurra realzaleek.

Julen eta Anttonek Zuriñe izango dute berriz ere alboan. Uda ostean beste itxura batekin itzuliko zaigu Aitziber Garmendiak hezurmamitzen duen pertsonaia. Halaber, platoan berrikuntzak ikusiko ditugu baita ere.

Eta nola, ez, aurkezleek batera, ohiko kolaboratzaileak: Iban Garcia, Nerea Alias, Nahiara Gago, Aitor Frantsesena, Maddalen Arzallus, Asisko Urmeneta eta Onintza Enbeita.

Iban Garciak aurten Euskal Herriko ekitaldi ezberdinetara bidaliko dute erreportari lanetan eta oraindik gure saiora etorri ez diren gonbidatuen bila joango da. Lehen ahalegina Benito Lertxundirekin egingo du.

Nerea Aliasek artxiboan arakatzen jarraitzeaz gain, Oroitzapenen kaxa estreinatuko du. Gonbidatuen herrira joan eta beraien lagun, irakasle edo familiakoekin hitz egingo du. Aitor Frantsesenak, nahiz eta gaitz fisiko eta mentalak izan, bizitzari bizi pozez aurre egiten dioten lagunak ikusaraziko ditu.

Kolaboratzaile berriak ere izango dituzte. Aneguria rap abeslaria eta Maitane Salinas kazetari eta aktorea, adibidez. Aneguriak, bat bateko abestiak sortuko ditu gonbidatuaren inguruan eta Maitena Salinasek 'Gurea da!' tartea aurkeztuko du. Euskal Herrian sortutako eta munduan saldu eta zabaltzen diren produktu, gauza edo bitxikeriak hurbiltzeko ikusleei.

Irailean 'Gure Kasa'n izango diren gonbidatuen artean, besteak beste, Amets Arzallus, Zuriñe Hidalgo, Iñaki Artola, Izaro Andres, Gorka Aginagalde, Jon Maia, Inaxio Perurena eta 'Oreina' filmeko lan taldea. Urrian, berriz, Xabier Madariaga, Koteto Ezkurra, Andoni Ortuzar, Fermin Muguruza, Edurne Ormazabal eta Arnaldo Otegi.

'Gure Kasa' astelehenetik ostegunera izango da ikusgai, eitb.eus-en eta ETB1en, 21:30ean.

Temas

Euskera

Contenido Patrocinado

Fotos

Vídeos