Getxo Folk jaialdiak Benito Lertxundi omenduko du 'Hunkidura kuttunak' ikuskizunarekin

Getxoko 41. Nazioarteko Folk Jaialdiari itxiera emateko Benito Lertxundiri omenaldia egingo zaio 'Hunkidura kuttunak' ikuskizunarekin, antolakuntzak aurreratu duenez. Irailaren 14an izango da eta oholtzan zortzi musikari elkartuko dira, bost gizon eta hiru emakume, eta beren interpretazioekin Orioko kantautorearen abestiak gaurkotu eta berpiztuko dituzte. Besteak beste, Mikel Markez, Idoia Asurmendi, Janus Lester edo Miruak Lertxundiren obra ulertzeko berezko ikuspegiak erakutsiko dizkiote publikoari.

'Oriotik Euskal Herrira Benitoren abestiekin' lelopean, emanaldiak «bidaia emozional batera» eramango du ikus-entzulea, «Lertxundiren kanten bidez Euskal Herriko kultura, historia eta sentimenduen paisaian murgilduz». Ikuskizunaren ekoizpena Baga-biga ekoiztetxearena da, eta zuzendari artistikoak Arkaitz Hormaetxe eta Jon Maya dira. Lantaldeak hilabeteak daramatza ikuskizuna prestatzen, 2024ko bukaeran Benito Lertxundiren oniritzia jaso zuenetik.

Musika ardatz nagusia bada ere, ikuskizunak diziplina anitzeko izaera du. Dantza, bertsoa, marrazkia eta bestelako arte adierazpenek beren tokia izango dute, ikusleari esperientzia estetiko eta sakona eskaintzeko helburuarekin. Kukai Dantza konpainiaren presentzia nabarmentzen da, bere «estilo garaikide eta sustraituarekin ikuskizunari mugimendu poetikoa eta indar eszenikoa» emango diolako.

«Hori guztia Euskal Herriko hainbat artistaren parte hartzearekin gauzatuko da, elkarlanetik sortutako ekitaldi berezi bat bihurtuz. Emozioa, artea eta oroimena uztartuko dira gau berezi honetan, Benito Lertxundiren lana eta ondarea belaunaldi berriengana eramateko xedez», azaldu dute.

Jaialdirako sarrerak eta abonamenduak uztailaren 7an jarriko dira salgai Getxo Kultura udal erakundeko ohiko kanaletan, Getxoko Udaleko iturriek jakinarazi dutenez.