Eusko Ikaskuntzak aldizkari digitala gaurkotu du

Euskonews atariko irudia/
Euskonews atariko irudia

Euskonews euskal zientzia eta kultura sarean zabaltzeko aldizkariak 20 urte bete ditu, eta berritu egin dute goitik behera. Diseinu «arina eta garbia» azaltzen du orain guneak

Euskonews euskal zientzia eta kultura sarean zabaltzeko aldizkaria Eusko Ikaskuntzak 1998ko irailaren 8an aurkeztu zuen. Hizkuntza erraz eta argi batetan, euskal errealitate zientifikoa eta kulturala mundu osoari zabaltzeko leihoa ireki zuten, eta orain, argitalpenak 20 urte bete dituen honetan, berritu egin dute goitik behera.

Aldaketa nabarmenena bere bilatzaile aurreratua da. Klik batetan hitz gakoen bilaketa zehatza egin daiteke, gaika, atalka, herrialde, udalerri, egile, onomastikoa edota hizkuntzari erreparatuz.

Itxurari dagokionez, diseinu «arina eta garbia» azaltzen du orain guneak, «Eusko Ikaskuntzaren webgune eta irudiarekin erabat integratuta eta irudietan arreta jarriaz».

Aurten, ia 1.500.000 orrialde kontsultatu dituzte, eta 600.000tik gora bisitari jaso ditu. Bi hamarkadatan, bestalde, 4.000tik gora izan dira egileak. Aldizkariko dokumentu funtsak 15.000 baino gehiago dira, 4.700 artikulu inguru eta 700 elkarrizketa baino gehiago.

Aniztasuna helburu, egile desberdinak jasotzen saiatzen dira alez ale, gai zehatzen inguruan eskarmentua eta jakituria duten erreferenteak bilduz. Hilero 7.000 harpidedunek jasotzen dute bere posta elektronikoan dohainik.

Temas

Euskera