Donostiara egingo du salto 'Ghero' antzezlanak

Obrako pasartea/Guillermo Casas
Obrako pasartea / Guillermo Casas

Patxo Telleriaren lanak, orain arte, 32 emanaldi eskaini ditu, eta beste 15 dituzte lotuta, urritik aitzina. «Fabulen fabula bat da». Abiapuntu du 3000 urtea; euskara desagertzeko zorian dago

DVDonostia

Urrian, Baionako Michel Portal antzokiak hartuko du 'Ghero'. Orain arte, 32 emanaldi eskaini ditu Tartean Teatro konpainiak, eta beste 15 dituzte lotuta, urritik aitzina. Donostian ere izango dira.

Honela, mendeurrenaren baitan Euskaltzaindiak Tartean-ekin batera ekoiztutako antzezlana Baionan (urriaren 8an), Gernikan (11n), Donostian (12an), Getxon (13an), Lauro Ikastolan (Bizkaia -17an-), Durangon (24an) eta Eibarren (25ean) ikusi ahal izango da.

Patxo Telleriak idatzi du Ghero, azken euskalduna-ren gidoia, eta Jokin Oregi da antzezlanaren zuzendaria. Mikel Martinez, Patxo Telleria, Olatz Ganboa, Iñaki Maruri eta Ane Pikaza dira antzezleak.

«Fabulen fabula bat da» obra, Telleria gidoilariaren esanetan. Lanak abiapuntu du 3000 urtea. Euskara desagertzeko zorian dago. Azken euskaldunak izkin egin nahi dio patu latzari.

«Bizirik irauteko grinari buruzko istorio bat» da, egileen esanetan. «Adierazi nahi genuen euskararekiko gure harridura eta gure miresmena».

«Guztira, bederatzi istorio dira, baina obrak badu osotasun bat, erritmo bat eta mamia, eta musikak ere pisu handia hartzen du tarteka», azpimarratu zuen aurkezpenean Mikel Martinez aktoreak. «Komedia bai, baina beste genero batzuk ere landu ditugu Gheron, eta estetika aldetik asko arriskatu dugula esango nuke. Jendea harrituko da egin dugun hautuarekin», gaineratu zuen Jokin Oregi zuzendariak.

Lan-taldea

Dramaturgia egilea
Patxo Telleria
Zuzendaritza
Jokin Oregi
Aktoreak
Mikel Martinez, Patxo Telleria, Iñaki Maruri, Olatz Ganboa, Ane Pikaza
Jantziak eta Eszenografia
Ana Garay
Musika egilea
Iñaki Salvador
Argiztapena
David Rodríguez
Diseinu grafikoa
Paradox
Kartelaren argazkia
Mikel Alonso
Ekoizpena
TARTEAN Teatroa
Ekoizpen Exekutiboa
Pio Ortiz de Pinedo eta Myriam Gartzia

Temas

Euskera