Estibaliz Urresolak jasoko du Gutako Bat saria

Vital Fundazioak antolatzen duen Zinemastea 41. Euskal Zinemaren Jaialdiak Estibaliz Urresola zuzendari laudioarrari emango dio Gutako Bat saria, euskal zinemari egin dion ekarpenagatik. Arabako zinemagintzako profesional esanguratsuen lana aitortzen du sariak eta Urresolak larunbatean jasoko du, otsailaren 1ean, jaialdiaren amaiera ekitaldian.

Vital Fundaziotik nabarmendu dutenez, '20.000 erle espezie' filmaren zuzendaritzak «inflexio puntu bat» ekarri dio Urresolaren ibilbideari, baita zinema sozialaren aintzatespena ere, eta 20 sari inguru jaso ditu.

2023an estreinatu zen '20.000 erle espezie' lanari esker, Laudioko zuzendaria «ate nagusitik sartu da zinemaren munduan». Ekai Lersundi Ondarroako 16 urteko mutil transgeneroaren suizidioan oinarritu zen gidoia idazteko. Ekai luzaroan izan zen tratamendu hormonal baten zain, baina ez zitzaion iritsi, eta ohar hunkigarria utzi zuen idatzita bere etsipena azaltzeko eta bere sufrimendua zabaltzeak aldaketa soziala eragin zezakeelako itxaropenean.

Ikus-entzunezko Komunikazioan, Edizioan eta Muntaiaren Teorian lizentziaduna da Estibaliz Urresola, eta Zinema Zuzendaritzako Masterra nahiz Film Business Masterra egin ditu.

Ikus-entzunezko Ekoizleen Elkartean ekin zion bere ibilbideari, Donostia Zinemaldiarekin lankidetzan, eta, ondoren, Bainet telebistarako edukien ekoizlearen postprodukzio arloko koordinatzaile lanetan aritu zen. Zuzendari independente bezala aritu ondoren, 2019an Sirimir Films ekoiztetxe propioa sortu zuen.

Zuzendaria eta gidoigilea da, eta bere filmografian hainbat lan nabarmen daitezke, hala nola 'Adri', 'Voces de papel', 'Nor Nori Nork', 'Polvo somos', 'Cuerdas' eta '20.000 erle espezie'. Azken film horri esker sari ugari irabazi ditu, besteak beste, Zinemastearen 40. edizioan epaimahaiak film onenari emandako saria.