Chillida Lekuk familientzako egitaraua prestatu du larunbaterako

Apirilean ireki zuten, zortzi urtez itxita egon eta gero, Chillida Leku/EFE
Apirilean ireki zuten, zortzi urtez itxita egon eta gero, Chillida Leku / EFE

Museoen Nazioarteko Eguna dela eta, musika, tailerrak eta bisita dinamizatuak antolatu dituzte Eduardo Chillidaren obraren berri emateko bertaratutakoei

DVDonostia

Chillida Lekuk bat egin du larunbatean izango den Museoen Nazioarteko Egunarekin, eta bereziki familiei zuzendutako programazioa antolatu dute. Egun osoan aukera egongo da bisita dinamizatuetan parte hartzeko, eta Eduardo Chillidaren obraren inguruko lantegietara eta musika emanaldi batera joateko ere.

Jardueretan «museoaren rol aktiboa» nabarmenduko dute, «topagune eta espazio dinamiko bat» dela erakusteko, bere arduradunek azaldu dutenez. Museoaren Hezkuntza Sailak antolatutako bisitan, neska-mutilek aukera izango dute, heldu batek lagunduta, bisita horietan parte hartzeko eta Chillidaren unibertsoa jolasen bidez ezagutzeko.

Bestalde, museoaren inaugurazio-asteburuan izandako arrakasta ikusita, 'Hutsunearen etxea' arte eta arkitektura eskolak tailerrak eskainiko ditu, eta adin guztietako pertsonek aukera izango dute «sormenez aztertzeko Chilidaren obran presente dauden denbora, espazio eta muga kontzeptuak». Lantegiak 11:00etatik 13:00etara eta 16:00etatik 18:00etara izango dira.

Jardunaldia ixteko, musikari ere lekua egingo diote, 18:00etatik aurrera Lurra Café-ko terrazan DJ emanaldi bat izango baitute museora bertaratzen diren guztiek.

«Eduardo Chillidaren legatua gorde eta mundura zabaltzeko misio nagusiaz haratago joanda, museoa zentro dinamiko bihurtzen da horrela, artearen bidez esperimentatzeko espazio bat, bai eta topaketa eta elkarbizitza ahalbidetzeko topagune bat ere, artistaren filosofia eta pentsamenduarekin bat eginda», azaldu dute.

Bisita berezietarako erreserba posta elektronikoz egin behar da, education@museochillidaleku.com helbidera idatzita. Eguerdiko 12:00etako bisita euskaraz izango da, eta arratsaldeko 17:00etakoa, aldiz, gaztelaniaz.

Temas

Euskera