Bueltan da haur eta gazteak irakurtzera animatzeko 'Liburuka' ekimena

Donostiako 22 ikastetxek parte hartuko dute ekimenean /AP
Donostiako 22 ikastetxek parte hartuko dute ekimenean / AP

Lau ekimen desberdinek osatzen dute ikasturte honetarako sortutako proposamena, horietatik hiru ikastetxeei zuzenduak daude eta laugarrena, berriz, liburuzainei

DVDonostia

Donostiako 22 ikastetxerekin elkarlanean, irakurketa sustatzeko 'Liburuka' proiektua aurkeztu du Donostia Kulturak. Lau ekimen desberdinek osatzen dute ikasturte honetarako sortutako proposamena, horietatik hiru ikastetxeei zuzenduak daude eta laugarrena, berriz, liburuzainei. Ikastetxeekin batera, Galtzagorri elkarteak ere parte-hartu du proiektua sortzeko lanetan.

'Motxila txikia' liburutegia, eskola eta familia lotzen dituen programa da. Haur Hezkuntzako (3-5 urte) eta Lehen Hezkuntzako 1. eta 2. mailako (6-7 urte) ikasleei zuzenduta dago. Haurrak liburutegira joango dira liburuak aukeratzera eta liburu horrek ibilbide bat egingo du, liburutegitik etxera eta ondoren eskolara.

Bestalde, 'Irakurle gazteak' egitasmoaren xede nagusia da Donostiako ikastetxeei liburutegietan mailegagarri dauden liburuak eskaintzea. LHko (6-11 urte) eta DBHko 1. zikloko (12-13 urte) ikasleei zuzenduta dago. Liburu mota desberdinak (albuma, narratiba, poesia, antzerkia, komikia eta ezagutza liburuak) bidaliko dira, euskaraz nahiz gaztelaniaz idatziak.

'Adur, Adur, ez naiz zure beldur' izango da aurtengo aretoa. Galtzagorri Elkarteak produzitu du eta Juan Kruz Igerabidek idatzitako Jonas eta Hozkailu Beldurtia liburuan du abiapuntua. Areto honek bi helburu nagusi ditu ikasleentzat: irakurzaletasuna sustatzea eta barruko nahiz kanpoko mamuak lantzea, haur literaturak eskaintzen dituen aukerak baliatuz. Aretoa azaroaren 11tik 29ra egongo da Udal Liburutegiko Mandaseko Duke Aretoan (Konstituzio plaza 1) eta dagoeneko itxi da izena emateko epea. Bisitarekin batera ikastetxeei Haur Liburutegia ezagutzeko aukera ematen zaie.

Proposamenak nola egin

Liburuzainei dagokienez, hiru ikastaro prestatu dituzte haur eta gazte literaturan formazioa jaso dezaten. Donostia Kulturako liburutegietako langileei zuzendutako ikastaro horiek dira, batetik, irakurzaletasuna sustatzeko lantegia (euskarazko liburu berri interesgarrien aurkezpena eta proposamenak horiek lantzeko) Galtzagorriko Intza Alkainekin.

Bestetik, prestatu dute, gaztelaniaz, 'Seleccionar y recomendar en la biblioteca. Guías de lectura y otras herramientas de promoción' Villar Arellanorekin. Hirugarrenik, gazteak irakurtzera animatzeko, 'Komikiari begiratzeko modu berriak: haur eta gazteen literatur ohiturak suspertzeko bideak' tailerra egingo dute Amaia Serrano eta Iratxe Retolazarekin.

Temas

Euskera