Bizkaiko Bertsolari Txapelketako azken kanporaketa, igandean

Urriaren 28an Plentzian jokatu zen kanporaketako argazkia./XDT
Urriaren 28an Plentzian jokatu zen kanporaketako argazkia. / XDT

Bosgarrena izango da, Berriatuan jokatuko da eta irabazleak urrats garrantzitsua egingo du abenduaren 15ean jokatuko den finalerako bidean

Bizkaiko Bertsolari Txapelketako bosgarren eta azken kanporaketa jokatuko da igandean, azaroaren 4an, Berriatuako Mendibarren frontoian. Saioa arratsaldeko 17:00etan hasiko da, eta Asier Alcedo (Portugalete), Ibai Amillategi (Gernika-Lumo), Itxaso Paia (Algorta), Lander Ibarluzea 'Aitxulua', Josune Aramendi (Markina-Xemein) eta Oihana Bartra (Bilbo) ariko dira.

Bizkaiko Bertsozale Elkarteak jakinarazi duenez, saioaren irabazlea zuzenean sailkatuko da azaroaren 25ean Igorren jokatuko den finalaurrekora, eta besteek puntuazioaren arabera edukiko dute finalaurrekoetan kantatzeko aukera. Igandean kantatuko duten sei bertsolarietatik bost udaberriko fasetik sailkatu dira txapelketara, eta Oihana Bartra, ostera, 2014an finalista izan zenez, zuzenean sailkatu da kanporaketen fasera.

Berriatuako kanporaketako gai jartzailea Idoia Anzorandia Kareaga izango da, eta epaimahaiko kideak, Alaitz Etxanobe, Ander Txakartegi, Jon Jaio, Jurgi Fuentes, Leire Etxebarria eta Miriam Juaristi. Idazkari lanetan Itziar Basterretxea ibiliko da.

Kanporaketetako fasean bertsolariek egin beharreko lanak hauek izango dira: zortziko nagusian ofiziotan hiruna bertso, zortziko txikian ofiziotan hiruna bertso, puntua emanda bertso bi zortziko txikian, hamarreko txikian ofiziotan hiruna bertso, eta bakarkako lanean, gai bati buruz bertso bi, doinu eta neurri librean. Kanporaketa fasearen ostean finalaurrekoak jokatuko dira, eta azkenik, abenduaren 15ean jokatuko da finala, Bilbao Arenan.

Temas

Euskera

Contenido Patrocinado

Fotos

Vídeos