Bikoiztaile euskaldunek egiten duten lana «ikusarazteko, azpimarratzeko eta hedatzeko» hitzarmena

Iñaki Beraetxe, Andres Urrutia eta Xabier Alkiza, hitzarmena sinatzen /Euskaltzaindia
Iñaki Beraetxe, Andres Urrutia eta Xabier Alkiza, hitzarmena sinatzen / Euskaltzaindia

Bikoiztaile Euskaldunen Elkarteak eta Euskaltzaindiak bost urteko akordioa sinatu dute: euskararen arloan ezarririko arauak eta proposaturiko gomendioak zabaltzeko konpromisoa hartu dute bi erakundeek

DVDonostia

Euskararen eta euskal kulturaren sorkuntzarako, sustapenerako, garapenerako eta zabalkunderako hitzarmena sinatu dute Bikoiztaile Euskaldunen Elkarteak (BIEUSE) eta Euskaltzaindiak. Bost urterako lankidetza proposatzen diren egitasmoen inguruan gauzatuko da, bikoiztaile euskaldunek egiten duten lana ikusarazteko, azpimarratzeko eta hedatzeko ekintzetan, hain zuzen.

«Guretzat garrantzi handiko hitzarmena da hau, Euskaltzaindiak gure asmoekin eta helburuekin bat egiteak hauspoa ematen digulako gure eskubideak aldarrikatzeko eta euskal bikoizketa bultzatzeko eta sustatzeko», esan du Iñaki Beraetxe BIEUSEko lehendakariak.

Bestalde, Andres Urrutia euskaltzainburuak aitortu du euskal bikoiztaileek urteetan eginiko «lan paregabea, bai eta egiten dihardutena ere», askotariko produktuak euskal hiztunei hurreratzen saiatzen baitira «euskararen zabalkundeari eta sustapenari ekarpen azpimarragarria eginez».

«Ekarpen hori, gainera, hainbatetan oso lan-baldintza prekario eta zailetan egin ohi dute eta horrexegatik da are azpimarragarriagoa egiten duten ekarpena eta erakusten duten engaiamendua», gaineratu du.

Euskaltzainburuak gehitu du euskal bikoizketa «ezinbestekoa» dela hizkuntzaren normalkuntzarako, eta etorkizunean erakunde bien arteko lana bultzatzeko asmoak agertu ditu.

Horrela, bi erakundeek sinaturiko lankidetza hitzarmenaren bidez, Euskaltzaindiak euskararen arloan ezarririko arauak eta proposaturiko gomendioak zabaltzeko konpromisoa hartu dute bi erakundeek.

Halaber, BIEUSEk bere eguneroko jardunean sortzen dituen materialetan, bai eta antolatzen dituen ikastaro, jardunaldi, mintegi, aholkularitza zerbitzu, aurkezpen eta euskararen sorkuntzarekin, zabalkundearekin, prestakuntzarekin zein erabilerarekin loturiko egitasmoetan ere, Akademiaren gramatika, lexiko, ortografia, onomastika eta euskalkien erabilerari buruzko irizpideak aintzat hartu eta horiek zabaltzeko moduak landuko ditu.

Egitasmoak partekatzeko konpromisoa

Gainera, BIEUSEk Euskaltzaindiari egingo dizkio gramatika, lexikografia, ortografia, onomastika eta euskalkien erabileraren inguruko kontsultak eta iradokizunak, eta Akademiak kontsulta horiei erantzuna eman edota bideratuko ditu, bikoizketaren izaera artistikoak eskatzen dituen berariazko beharrak lehenetsiz.

Bi erakundeok euskararen jakitean, erabileran zein haren aldeko sustapenaren ikerketan, dibulgazioan eta sentiberatzean, egitasmoak partekatzeko konpromisoa hartu dute, bereziki, bikoiztaile euskaldunen inguruabarrarekin lotura izan dezaketenak, eta Euskaltzaindiak bere egoitza zein ordezkaritzak eskainiko dizkio BIEUSEri, adosten dituzten jardueretan baliatzeko.

Azkenik, Euskaltzaindiak garatzen diharduen Lexikoaren Behatokia elikatzeko asmoz, BIEUSEk argitaraturiko euskarazko testu multzoaz baliatzeko adostasuna erakutsi dute.

Temas

Euskera