Bere testuak irakurrita omenduko dute Rikardo Arregi

Rikardo Arregi /DV
Rikardo Arregi / DV

Bete dira 50 urte Rikardo Arregi andoaindarra hil zenetik; omenaldia azaroaren 28an izango da, Andoaingo Bastero plazan, goizeko 10:00etatik arratsaldeko 18:00ak arte, etenik gabe

DVDonostia

Rikardo Arregik idatzitako hainbat idazlanen irakurketa publikoa egingo da, azaroaren 28an, Andoaingo Bastero plazan, goizeko 10:00etatik arratsaldeko 18:00ak arte, etenik gabe. Guztira, 225 pertsonak parte hartuko dute. Aurten bete dira 50 urte Rikardo Arregi andoaindarra hil zela, uztailaren 10ean, zehatz esanda, Mendaron, zoritxarreko auto istripu batean. Kazetari izandakoa gogoratu eta omentzearren,'Rikardo Arregi Irakurtzen, 50 urte ondoren' ekimena antolatu dute.

Andoaingo Udaleko Euskara Batzordeak antolatu du ekimena, Udalarekin batera, antolakuntzan parte hartuko dute Andoaingo euskaltegiak (AEKren euskaltegia) eta Manuel Larramendi Kultur Bazkunak.

Andoaingo herriak uretro antolatzen du Rikardo Arregi Kazetaritza Saria. Egun berean egingo dituzte sari banaketa eta irakurketa aurten. Aurrtengo sari-banaketa irakurketa publikoaren egun berean izango da, irakurketa bukatu eta berehala, iluntzeko 19:00etan, Basteron bertan.

Ekintzailea, pentsalaria, kazetaria, idazlea, hizlaria... hori guztia izan zen Arregi. Bere kezka eta intereseko kontuak zituen euskara, politika, gizarte gaiak oro har, nazioarteko gorabeherak, erlijioa, ideologiak, filosofia eta kulturgintza. Arduratzen zuen baita ere Andoain herriak eta Andoaingo euskararen eta kulturaren osasunak.

Hirurehundik gora artikulu idatzi zituen Zeruko Argia, Jakin eta Anaitasuna aldizkarietan. Hainbat saiakera idatzi zituen euskaltzaletasunaz, erlijioaz, sozialismoaz edo marxismoaz. Berak proposatu eta sustatu zuen, antolaketan ere parte hartuz, Euskaltzaindiaren eskutik Euskal Herri osora zabaldu zen lehenengo euskarazko alfabetatze kanpaina. Berritzaile izan zen euskarazko liburugintzan ere, Lur argitaletxearen zimentarriak jarriz.

Herritarren parte hartzea

Rikardo Arregiren omenezko ekimena azaroaren 28an, ostegunarekin, izango da, egun osoz, Basteron, goizeko 10:00etatik arratsaldeko 18:00ak arte. Guztira, 225 lagun inguruk parte hartuko dute, eta bakoitzak bi minutu eta erdiko testua irakurriko du. Testu hori aldez aurretik emango zaio irakurle bakoitzari, irakurketa eguna baino astebete lehenago, publikoan irakurriko duena aurretik ezagutu dezan.

Antolatzaileek (Udalak, Andoaingo AEK euskaltegiak eta Manuel Larramendi Kultur Bazkunak) andoaindarren ahalik eta parte hartzerik zabalena lortu nahi dute, eta horregatik dei egiten diete herritarrei irakurketan parte hartzera. Parte hartzeko egin behar den gauza bakarra da bi minutu eta erdian testu bat irakurtzea. Testu hori izango da Rikardo Arregik idatzitako idazlan baten zatitxo bat.

Temas

Euskera