Baloiaren sosak

Egiazko kopa eskuratzen duen selekzioak 33 milioi euro lortuko ditu. Apurrak, guztira mugitzen den dirutza kontuan hartuz gero./REUTERS/TORU HANAI
Egiazko kopa eskuratzen duen selekzioak 33 milioi euro lortuko ditu. Apurrak, guztira mugitzen den dirutza kontuan hartuz gero. / REUTERS/TORU HANAI

Ostegunean hasi eta Sanferminetako biharamunean bukatuko da. 32 talde lehia bizian. Planeta osokoak. Helburua? Ametsa? Kopa bat. Galaxia oso baten desira. Errusiako Mundialaz ari gara. Baina, zenbat balio du kopa horrek?

Begoña del Teso
BEGOÑA DEL TESO

Sergio Ramosek Salah baloiaren poeta egiptoarra lesionatu zuen egun berean; Karius atezain alemanak baloia bitan gaizki harrapatu zuen egun berean; Real Madridek bere Champions hamaikagarrena lortu zuen egun berean, LASA izeneko kongresua itxi zen Bartzelonan, Latinoamerikako intelektualen bilkura, maila gorenekoa. Bilera akademiko serios horretan futbola izan zuten, beste gai pila baten rtean, hizpide eta eztabaidagai. Kongresuaren itxiera zeremonia Barça-ren Camp Nou-n izan zen. Hantxe izanak inor ez zuen harritu. Ez horixe.

Deliberamenduz deliberamendu, hainbat konklusio geratu ziren mahai eta harmailen gainean. Esaterako, hemendik aurrera nahiz eta Var bideo arbitrajearen bitartekotza izan partida guztietan, zoria izango da beti joko honen ikurra, ez izan dudarik. Esaterako, akademikoek ozen eta aho batez aldarrikatu zuten futbolaren asmamen poetikoa. Guardiolak esana behin: «Finalean zaudela eta ez duzula erdilaririk? Ba asmatu bat!» Esaterako, polita litzateke dirua ez balitz horren garrantzitsua zelaietan eta bulegoetan. Are ederragoa ezinbestekoak formakuntza eta irudimena izango balira eta ez diru zorroa

Itxaropentsu, hainbat akademikok eutsi zioten Johan Cruyff handiak behin esandakoari : «Sekula ez dut ikusi gola markatu duen diru zakurik». Egia zioen holandarrak, baina are egia handiagoa da egun dirua dela funtsezkoa zelaietan. Bulegoetan. Palkoetan. Aldageletan. Ez dugu hemen aipatuko ez xeke arabiarrik ez zenbat pagatu zion PSGk Barçari Neymarren truke. Horiek iraganeko kontuak dira. Egungoak, berriz. ostegunean hasi zen Mundialarenak. Honako hauexek:

Futbol txapelketa honen antolatzaileek darabilten aurrekontua 9.800 milioi eurokoa da. Izugarria? Ez pentsa. 2014ean Brasilen izan zen Mundialeko zifrak handiagoak suertatu ziren: 12.700. Baina oraingokoan babesle berriek antolakuntzak bere gain hartu behar zituen gastu askoren zama onartu dute. Horrexegatik diru-aldea.

Beste aurrekontu-sail guztietan igoera egundokoa izan da. Lehian dauden 32 selekzioren artean 340 milioi euro banatuko dira. 2014an baino 36 gehiago. Txapeldunak 33 sakelaratuko ditu. Txapeldunordeak ere patrika bete sos egingo du alde Errusiatik : 25 eskuratuko ditu. Lehen kanporaketetan huts egingo dutenak ere ez dira esku hutsik bueltatuko aberrira: 7 milioi jasoko dituzte.

Munduko futbolaren erakunde nagusiak (FIFAk, hots) Brasilen baino %37 gehiago bideratuko du dibidenduak banatzera. Ez bakarrik selekzioen artean. Planetako klubek ere jasoko dute euro /dolar kopuru polita. Zergatik? Azken finean klubek ez dute parte hartzen Mundialean, ezta? Ez, baina beren futbolariak 'utzi', 'maileguz eman' egiten dituzte. FIFAk, esker onez, 177 milioi partituko ditu haien artean. Realak, adibidez, ez ditu bakarrik sosak jasoko Odriozolarengatik. Baita Mexikoko selekzioan jokatuko duen Hector Morenorengatik ere. Eta Belgikakoaren parte izango den Januzajengatik. Eibarrek sos-eskukada majoa lortuko du, Inui Japoniako heroietako bat izango delako. Eta Dimitrovic, Serbiako esperantza. 7.083 euro eguneko da kantitate zehatza.

Klubek badute beste diru sarrera garrantzi handiko bat: FIFAk 113 milioi gordetzen ditu aseguruentzako. Futbolari batek min hartzen badu, lesionatzen bada Mundialean, bere klubak dirua jasoko du kalte-ordain gisa.

Primen kontua

Bada beste istorio bat, jakin-min izugarria eragiten duena zaletuen (eta hain zaletu ez diren horien) artean: jokalariek lortzen dituzten primak, hobariak, diru-sariak. Baina txanpon horiek ez daude FIFAren eskuetan, herrian herriko federazioenetan baizik. Frantziakoak, adibidez, 280.000 euro futbolari bakoitzeko itundu du. Txapelketa irabaziz gero, jakina. Alemaniakoak pixka bat gehiago erabaki du futbolariekin hainbat bilera izan eta gero: 350.000. Brasil egoera ekonomiko bastante larrian izan arren, bertako Federakuntzak 800.000 agindu die. Espainiakoek milioi bat inguru izango dute sari.

Bai, mareatzeko modukoak dirudite zifra horiek, baina kontuan izan Mundialeko Kopa irabaziz gero, zientoka enpresak Federazio garailearen babesle izan nahiko dutela eta dirua barra-barra sartuko dela bere kutxetan. Espainiaren kasuan, horren ondo sarituriko jokalari horiek bigarren Mundiala bereganatuko balute, 10 milioitan handituko (omen, bide) litzateke babesleen ekarpen ekonomikoa. Ezinbestekoa, izan ere, ze Kopa eskuratzearekin batera, RFEFak 20 milioi baino gehiago eman beharko baitie 23 futbolariei.

Handia zen Cruyff. Azkarrak oso LASA kongresuan bildu ziren intelektual prestu horiek, baina oker ziren: poltsikoak diru bete dituztenek sartuko dituzte golak ostegunean hasi zen Mundialean. Eta gol bakoitzak ekarpen ekonomiko ikaragarria eragingo du kluben, federazioen eta babesleen kontu korronteetan. Espainiakoak, pentsa, zenbaturik ez zituen 2 milioi euro jaso ditu dagoeneko: Real Madridek Lopetegi entrenatzailearen deuseztapen klausulagatik pagatu behar izan dituenak, hain zuzen ere.

Huskeria, hutsaren parekoa kontuan izanda ostegunean hasi zena Mundial guztietan garestiena dela: 883 mila milioi errublo gastatu ditu Errusiak azpiegiturak direla, zelaiak direla, hotela eta selekzioen egoitzak direla.

15 mila milioi dolar munduak Putinek gobernatzen duen herrialdeak eragindako barrabaskeria geopolitiko-ekonomiko-zibernetiko-sozial guztiak ahantz ditzan. Hilabete batez, bederen.

Temas

Euskera

Contenido Patrocinado

Fotos

Vídeos