Arabako hainbat ikastetxek zerga hezkuntzari buruzko prestakuntza emango dute

Arabako hainbat ikastetxek zerga hezkuntzari buruzko prestakuntza emango dute
Igor Aizpuru / El Correo

Eusko Jaurlaritzarekin eta Bizkaiko eta Gipuzkoako Ogasunekin elkarlanean antolatu du ekimena Arabako Foru Ogasunak

El Diario Vasco
EL DIARIO VASCO

Arabako hogeiren bat ikastetxek bat egin dute Arabako Foru Ogasunak zerga hezkuntzari buruz datorren ikasturterako martxan jarritako ekimenarekin. Ekimen honen xedea da herritarrak gazte gaztetatik kontzientziaraztea iruzurraren aurka egin behar dela eta gazteei prestakuntza ematea zergen funtzionamenduaz eta haien garrantziaz.

Horretarako, Derrigorrezko Bigarren Hezkuntzako (DBH) 4. mailatik aurrerako ikasleei zuzenduriko hezkuntza modulu bat eskaini du. Moduluaren proposamenetako batzuk dira online jokoak eta quiz-erako erronkak hurbileko adibide eta guzti, talde lantegiak, bana banako jarduerak eta ekonomia simulagailu errazak.

«Lortu nahi dena da gazteek uler dezatela zein garrantzitsua den zergak ordaintzea eta zer nolako lotura duten haiek erabiltzen dituzten zerbitzu publikoekin, hala nola gizarte etxeak, igerilekuak, ospitaleak edo ikastetxeak. Aldundiaren ekimen honen helburua funtsean da prestakuntza ematea etorkizuneko zergapekoei, ikastetxeen laguntzarekin», adierazi dute Foru Ogasunetik.

«Zerga kontuak ez dira errazenak baina bere oinarrian dauden printzipioak oso sinpleak dira, eta denok ezagutu eta eztabaidatzeko modukoak: justizia fiskala, progresibitatea edota eraginkortasuna, esaterako.

Horrekin batera argi dago zergen beharra ulertzeko edo gizarte aurreratuetan zergek duten ezinbesteko funtzioa ondo ulertzeko, funtsezkoa dela bildutako dirua zertan gastatzen den ezagutzea.

Biak lotuz beraz, gure bizitzan sektore publikoak duen garrantziaz jabetzeko lehen urrats batean honakoak ezagutu behar ditugu: alde batean, diru publikoaren iturria (zerga-sistema) eta bestean, diru horren erabilera (aurrekontu publikoak).

Kontzeptu sinple horiek herritarrengan, eta batez ere, ondorengo belaunaldietara hurbiltzeko sortu izan da unitate didaktiko hau. Izan ere, diru publikoaren inguruko ezagutza eta kontrola ez delako gutxi batzuen esku geratu behar; gizarte demokratiko batean herritar orok izan behar duelako denon artean eratzen dugun sektore publiko hori nola funtzionatzen duen jakiteko eskubidea eta betebeharra.

Unitate didaktiko hau norabide horretan eragin nahi duen ekimen berritzailea da, zalantzarik gabe, eta espero dezagun aipatutako helburu horiek lortzeko bidean baliagarri izatea. Giza obra guztiak bezala, hau ere etengabeko osatze prozesuan dago eta egingo duzuen ekarpen eta iruzkin guztiak ongi etorriak izango dira.»

Eusko Jaurlaritzarekin eta Bizkaiko eta Gipuzkoako Ogasunekin lankidetzan abiarazitako jarduera da Arabakoak egingo duena, eta ikasturte bakoitzean Arabako bostehun ikasle inguruk parte hartzen dute.