Adarra saria emango diote Berri Txarrak taldeari

Berri Txarrak taldea/Juan G. Andres
Berri Txarrak taldea / Juan G. Andres

Kontzertua emango dute Victoria Eugenia Antzokian ekainaren 21ean, Donostiako Udalaren saria jaso eta gero. Sarrerak asteazken honetan jarriko dituzte salgai

El Diario Vasco
EL DIARIO VASCODonostia

Ekainaren 21ean, eguerdian, jasoko du Adarra saria Berri Txarrak taldeak, Donostiako Udaletxean. Egun berean, arratsaldeko 20:00etan, taldeak kontzertua eskainiko du Victoria Eugenia Antzokian. Musika taldearen ibilbide artistiko eta profesionala eta euskal nahiz nazioarteko publikoarengan duen eragin izugarria hartu ditu kontuan sariaren irabazlea aukeratzeko epaimahaiak. Sarrerak asteazken honetan jarriko dituzte salgai, maiatzaren 21ean.

Juan González Andrés kazetariak, Irene Larraza Etxepare Institutuko zuzendariak eta Jaione Askasibar Donostia Kulturako Komunikazio zuzendariak osatu dute hautaketa egiteko Aholku Batzordea.

Berri Txarrak-en emanaldiek arrakasta handia izan dute herrialde askotan eta taldeak milaka jarraitzaileei eskaini dizkie kontzertuak bost kontinenteetako agertokietan. Nazioartekotasun horregatik, eta Euskal Herri osoan ere izan duten ibilbideagatik emango diete, hain zuzen, saria.

Aurten musika uztera doa Berri Txarrak taldea, «etenaldi mugagabea egitera», pasa den abenduan adierazi zutenez. Hilaren 12an iragarri zuen hirukoteak «ziklo ahaztezin bat» itxiko dutela aurten, 'Ikusi Arte Tour' izeneko bira luze bat egin ondoren, «etenaldi mugagabea» egiteko.

Hala ere, lehenengo, Berri Txarrak taldeak kontzertua emango du Bilboko Kobetamendin, uztailaren 14an. Taldeak jakinarazi du «ezohiko» kontzertua eskainiko duela uztailean, Bilboko Kobetamendin, Ikusi Arte Tour biraren baitan. «Hona inor kanpoan utzi beharko ez lukeen emanaldia: Berri Txarrak zuzenean, Bilboko Kobetamendin, uztailaren 14an. Ezohiko saioa izango dela ere aurreratu diezazuekegu, Ikusi Arte Tour biran eskaintzen ari garenetik ezberdina», adierazi du taldeak.

Agertokian lagun izango dituzten musikari gonbidatuen izenetako batzuk iragarri dituzte Badok atariaren bidez: El Drogas, Leire Iseo, David Ruiz (La MO.D.A.), Aiora Renteria (Zea Mays) eta Iñaki Altolagirre Matxet (Jousilouli, Anai Arrebak, Naizroxa, Sega Sound Killers) ariko dira Berri Txarrak-en kontzertu berezi horretan.

Temas

Euskera