Antonino Ibarrondo banda-zuzendariaren biografia argitaratu da, ehun urteak direla-eta

Antonino Ibarrondo, orain dela ehun urte jaiotako banda-zuzendariaren biografia aurkeztu da Oñatin. Bertan izan da Felix Ibarrondo, haren semea, musika garaikidearen konpositore ospetsua. Eta hantxe zen Inaxio beste semea ere, Oñatiko bandaren egungo zuzendaria.

Antonino Ibarrondo Oleaga (1914-1985) biografia Oñatiko bi lagunek idatzi dute: Jose Antonio Azpiazuk eta Xabier Ugartek. 1940an hartu zuen Antoninok Oñatiko musika bandaren zuzendaritza, eta ondorengo hamarkadetan hainbat laguni irakatsi zion musikaren oinarriak. Gero, 1972an, Sestaoko bandan hasi zen zuzendari, eta han akademia bat sortu zuen hainbat ikasle izan zuena. Eta bizitzako azken aroan 1980an hasita Bilboko bandaren zuzendari jardun zuen.