Viveros San Antongo Kadeteak azken txanpan

Viveros San Anton-Zumaiako T.E.ko kadeteak. / VIVEROS SAN ANTON
Viveros San Anton-Zumaiako T.E.ko kadeteak. / VIVEROS SAN ANTON

El Diario Vasco
EL DIARIO VASCO ZUMAIA.

Errepideko txirrindulari kadeteen denboraldia azken txanpara iritsi da. Larunbatean Ordizian jardungo dute eta, hilaren 29an, Azpeitian. Horrela bukatutzat emango da 2018ko denboraldia, nahiz eta abuztuan kriteriumen bat gelditu.

Aurreko asteburuan, taldekako erlojuaren aurkakoan podiumeko borrokan gertu ibili arren, azkenean kanpo gelditu ziren Viveros San Anton-Zumaiako T.E.ko kadeteak. Oñatiko Ulmak, talde irabazleak, Viveros San Antoni 1:58 atera zion. «Aitor Agirre, Roman Zabaleta, Mikel Mancisidorrek eta Kimetz Etxabek lan ona egin zuten, nahiz eta oraindik ere taldekako erlojupekoan asko izan ikasteko», adierazi du Zumaiako Txirrindulari elkarteko kide den Arritxu Iribarrek.

15 talde izan ziren parte hartzaileak, eta bosgarren denborarik onena egin zuten Legorretako helmugan. «Berez, laugarren beharko lukete, Irungo taldeak ez baitzuen ibilbideko arautegia bete, baina podiumeko postuak jokoan ez zeudenez, huts egitearen zigorra ez zen deskalifikazioa izan».

Bihar, Ordizian «amaiera gogorra» izango dute, Amezketatik Larraitzera igo eta jaitsi ondoren, zuzenean helmugara bideratuko bai dira txirrindulariak. «Oroitzapen onak sortzen dizkio Viveros San Antoni lasterketa honek, bere garaian Gorka Etxabek garaipena lortu bai zuen. Ordizian, apendize ebakuntza gainditu ostean, Ander Altuna berriz ere dortsala jarrita errepidean izango dugu. Beraz, taldeak kide guztiak izango ditu lehian, aspaldiko partez», dio Iribarrek.

Jubeniletan EH torneoko beste lasterketa puntuagarri bat izan zuen igandean Aiegin Antton Tolosak; 73 txirrindularik bakarrik bukatu zuten lasterketa, parte hartutako erdiek gutxi gorabehera. Zumaiarra 65. sailkatu zen, «ibilbide gogor bati eta bero itoari aurre egin ostean. Helburuak betetzen ari da Antton Tolosa; aurki etentxoa izango du, baina asteburu honetan Mendiko kriteriuma jokatuko du». Bi lasterketek osatzen dute kriteriuma, larunbatean Oñatin (Arantzazuko igoera, eta aurretik beste 70 km) eta, igandean, Urretxun. «Lasterketa hau prestigio handikoa da eta Euskal Herriko txirrindulari onenak bertan izango dira», azaldu du Arritxu Iribarrek.

 

Fotos

Vídeos