Udal liburutegirako administraria kontratatzeko prozesua abiarazi du Udalak Lanbideren bitartez

El Diario Vasco
EL DIARIO VASCOZUMAIA.

Zumaiako Udalak abiarazi berri du, Lanbideren bitartez, udal liburutegirako administraria kontratatzeko prozesua. Horren helburua da, hainbat herritarrek egindako eskaerari jarraiki, udal liburutegiaren ordutegia, azterketa garaitik haratago, urteko gainerako hilabeteetara ere zabaltzea (uztaila eta abuztua izan ezik), 9:30-20:00 bitartean ordutegi jarraian. Interesdunek Lanbiden eman beharko dute izena eta merituen balorazioak egiteko egiaztagiriak, aldiz, udaletxean aukeztu beharko dituzte, bi kasuetan, ekainaren 14a bitartean.

Eskaintzaren ezaugarriak

Lanaldi erdiko lanpostua izango da eta ordutegia, aldiz, ondorengoa: 17:00-20:00 astelehenetik ostiralera eta 9:30-13:30 hiru larunbatean behin. Uztaila eta abuztuan: 9:00-14:00 astelehen, asteazken eta ostiraletan; 10:00-14:00 eta 18:00-20:00 astearte eta ostegunetan. Kontratuaren iraupena, hasiera batean, abendua bitartean izango da.

Hautagaiek bete beharreko baldintzak honako hauek dira: gutxienez, Batxilergoa edo Bigarren Mailako Lanbide Heziketa edukitzea, edota indarrean dagoen legerian parekotzat hartutako tituluren bat edukitzea. Euskara maila: 3. HE edo baliokidea den tituluaren jabe izatea.

Hautaketa prozesua arautuko duten irizpideei dagokienez, prozesuari azkartasuna emateko, kontratazioa lehiaketa bidez egitea proposatzen da eta ondoren azaltzen diren merituak baloratuko dira: Bibliotekonomia eta dokumentazioaren diplomatura edo gradua; Informatika; liburutegiarekin lotura duten ikastaroak egin izana eta lan eskarmentua.