Zumaia

'Scrooge eta mamuak' antzezlana eskainiko da bihar Aita Marin

'Scrooge eta mamuak' antzezlana eskainiko da bihar, igandea, 16:30ean, Aita Mari aretoan. Charles Dickensen 'Gabonetako ipuina' lanaren egokitzapena da honakoa, Khea Ziaterren estilo paregabean sortua: film eszenikoa. Antzerkia, zinema eta panpinak uztartzen ditu Ebenezer Scrooge bankari berekoi eta diruarekin obsesionatuaren eraldaketa kontatzeko. «Roberta bere enplegatuari egun librea ukatu ondoren, Marley bere bazkide zenaren mamuaren bisita jasoko du, eta honek bere patuaz ohartarazi eta hiru izpiritu bidaliko dizkio. Hauek iraganetik, orainetik eta etorkizunetik bidaia bat egitera eramaten dute, maitasuna eta eskuzabaltasuna berraurkitzen lagunduz. Azkenik, Scrooge biziz eta maitatzeko gogoz betetako pertsona bezala berpizten da», aurreratzen du sinopsiak.

Sarreraren prezioa 4,25 eurokoa da eta sarrerakzumaia.eus webgunean, turismo bulegoan eta leihatilan (emanaldiaren aurretik) eskuratu daitezke.