Zumaia

San Agustin egunarekin amaituko dira sanbartolomeak gaur Oikian

Oikia hilaren 22tik dago San Bartolome jaiak ospatzen. Gaur, hilak 28, San Agustin eguna ospatuz amaituko dira jaiak.

Merezi duten amaiera emateko, jarduera-egitarau oparoa izango da, guztion gusturako. Egunean zehar, giroa alaitzeko, Enaitz Alberdi eta Erkizi trikitilariak eta Inpernupeko joaldunak izango dira. 11:00etan meza ospatuko da.

12:00etan, herritarren arteko herri kirolak egingo dira. Indarrak berreskuratzeko, 14:30ean paella jana egongo da, eta bazkalondoren, bingoa.

Arratsaldean, 18:30etik aurrera, euskal mitologian eta inauterietako mundu magikoan murgiltzeko ekintza egingo da.

Gauean, 22:30etik aurrera, Izer eta Alabier trikitilariak arituko dira musika jartzen; 23:30ean akelarrea izango da eta, azkenik, gauerdian, txin-txin herrikoia egingo da.