Zumaia

Kamikaz Kolektiboaren 'Renata' antzerkia ostiral honetan Aita Mari aretoan

Ostiral honetan, hilak 16, Kamikaz Kolektiboaren 'Renata' antzezlana eskainiko da, 20:00etan, Aita Mari aretoan. Sarrerak 8,50 euroan daude salgai (5,95 euroan Gazte Txartelarekin) turismo bulegoan eta www.sarrerakzumaia.eus webgunean emanaldia hasi baino ordu erdi lehenagora arte, eta aretoko leihatilan, antzezlana hasi aurretik. 'Renata' antzezlanak umorea eta absurdoa uztartzen ditu, eta Iraia Elias, Amancay Gaztañaga, Erika Olaizola eta Xanti Agirrezabala ditu protagonista. Laurak dira antzezlanaren testuaren sortzaileak eta hura zuzentzeaz arduratzen direnak.

«Azken orduko albistea: Renata hil eta berpiztu egin da! Renata 133. aldiz hil da; marrazoz betetako igerilekura salto egin eta bururik gabe geratu denean. Lasai, berehala berpiztuko baita. Renata etengabe hil eta pizten da, esku artean hil ala biziko misio bat daukalako. Pantailen artean desitxuratzen ari den sistema aldrebes baten erdian, lortuko ote du nola bizi ahaztu duen jendartea esnatzea?», aurreratzen du ostiralean eskainiko den obraren sinopsiak.