Itsasoratzearen Jaialdia bi egunetan egingo da, larunbat eta igandean

Arroza lehiaketa. Elkano erara egin beharko dute lehiakideek, eta gero bazkari herrikoia. / AMAXKAR
Arroza lehiaketa. Elkano erara egin beharko dute lehiakideek, eta gero bazkari herrikoia. / AMAXKAR

Herriko eragile, norbanako, Elkano 500 Fundazioa eta Getariako Udalaren eskutik antolatu da ekimena

JUAN MARI ZUBIAURREGETARIA.

Elkanoren Itsasoratzea Mundubiraren Ubera ekimenaren barne antolatu den egitaraua zabala da eta asteburuan bereziki ekintza ugari izango dira, larunbat eta igandean.

Larunbatean gaztetxoenentzat prestatutako ekintzak hauek izango dira: antxoa tailerra, ginkana, astronomia eta nabigazioa, itsasoa besarkatzen gyotaku teknikarekin, mural erraldoi kooperatiboa eta txapa tailerrak eta ipuin kontalariak (Ane Azkue, Aingeru Aramendi eta Karmele Martiarena).

Guztientzat prestatutako ekintzak berriz hauek izango dira: erakusleihoen mundubira lehiaketa, herri bazkaria 'Arroza Elkano erara', ur jolasak moilan eta 'Soinuz Blai' herriko musika taldearekin erromeria. Ur jolasak arratsaldeko 17:00etan egingo dira eta beste ekimen guztiak berriz, goizeko 10:00etatik 14:00etara.

Igandean musikarekin kale-jira egingo da. Eguerdiko 12:00etan portuan, herritarren eta motortxikien elkarteratzea (arrantzalez jantzita joatea animatzen da). 12:30ean Itunaren aurkezpena ekitaldia eta ondoren Elkanoren Itsasoratzea motortxikiekin. Eguraldiaren baldintzapean, moilan izango dira ekintzak.

Arroz lehiaketa

Arroza Elkano Erara I. Lehiaketan parte hartzeko izen-ematea zabalik dago (gaur izango da azken eguna); turismo bulegoan apuntatu behar da. Lehiakideek binaka hartuko dute parte eta, gutxienez, hamar pertsonentzako arroza egin beharko dute. Antolatzaileek espeziak (kanela, piperrautsa, safrana, intxaur muskatua, iltzea eta jengibrea), arroza, sua eta paella-ontziak jarriko dituzte, beraz, parte-hartzaileek nahi adina osagai eta sukaldeko tresnak eraman beharko dituzte, baita paella-ontzia ere, hala nahi badute.

Lehiaketa moilan egingo da, 12:00etatik aurrera. Bi ordu beranduago itzaliko dira suak eta 15 minutura bilduko da epaimahaia irabazleak aukeratzeko. Lehenengoek afaria irabaziko dute Elkano jatetxean, bigarrenek Maisor antxoa obradorearen produktu sorta, eta hirugarrenek Batelaren produktu sorta.