Irati Osak Europa eta munduko pista txapelketako taldeak osatzeko probak egin ditu

Itxas-Gainek bigarren postua lortu du, taldeka, Euskal Itsas Ligako bigarren proban

El Diario Vasco
EL DIARIO VASCO ZUMAIA.

Piraguismoaren jarduerak ez du etenik eta aurreko astean arlo desberdinetan aritu dira Itxas-Gain taldekoak.

Pontevedrako Verducido urtegian, asteazkenetik ostiralera, Espainiako selekzioko hautaketa probak jokatu dira Europa eta Munduko Pista Txapelketako taldeak osatzeko. Bertan izan da Irati Osa. Nesken 23 urtez azpiko mailan eta 200 metroetan, zazpigarren postuan amaitu du; 500 metroetan 13. postuan, eta azkenik 1.000 metroko frogan laugarren postua lortu du.

Espainiako federazioko hautatzaile eta teknikoek orain emaitza guztiak aztertu ondoren osatuko dute Munduko eta Europako Txapelketetako taldea. Lortutako emaitzekin Iratik aukera handiak ditu, uztailaren 11tik 14ra, Txekiar Errepublikan jokatuko den Europako Txapelketan egoteko. «Uretan egin beharreko lanak egin ondoren, orain hautatzaileeen iritzien zai egotea geratzen da», diote Itxas Gainetik.

Bestalde, igandean Pasaiako badiatik aterata Euskal Itsas Ligako bigarren proba jokatu zen, eta bertan Senior k2 mailan Eñaut Aizpurua eta Jabier Solozabalek osatutako ontziak garaipena lortu zuen. Proba berean Jon Lazkano eta Karmelo Txapartegiren ontziak hirugarren amaitu zuen. Banakako mailan, Oier Aizpuruak helmugan bigarren postua lortu zuen esprintean, eta honekin batera, beterano mailako garaipena. Taldeka, Itxas-Gainek bigarren postua lortu zuen.