Zumaia

Hasi da KAE1 Liga gizonezkoen traineruarentzat

Sukia-Zumaia traineruak asteburu honetan hasi du KAE1 Liga. Telmo Deun A.E.-ren gizonezkoen ontzia bikain hasi zen, bigarren postua lortuz, 20:23:22ko denborarekin, larunbatean Astilleron jokatu zen lehen jardunaldian.

Ez zitzaion hain ondo joan bigarren jardunaldian, Pasaian. Sukia-Zumaia traineruak bosgarren postuan bukatu zuen II-Adinberri Bandera-XL Pasaiako Ikurriñan, 20:56:11ko denborarekin.

Denboraldiko lehen bi banderak Santurtzirentzat izan ziren (20:13:46 Astilleron, eta 20:40.60 Pasaian).

Bi hitzorduak batuta, Zumaiako gizonezkoen ontzia sailkapeneko hirugarren postuan dago 19 punturekin. Asteburu honetan Donibane Lohizunen eta Portugaleten lehiatuko da.

Bestalde, Zumaiako beteranoen traineruak beteranoen I. Adinberri Bandera irabazi zuen B kategorian, larunbatean Pasaiako badian.