Zumaia

Flysch Organoaren Nazioarteko Zikloa Zumaiako San Pedro elizara iritsiko da igande honetan

Flysch Organoaren Nazioarteko Zikloaren hamargarren edizioa igande honetan iritsiko da Zumaiako San Pedro elizara. Marixi Sesma (klarinetea) eta Mª Carmen Azpeitia (organoa) izango dira protagonista, eta kontzertua 20:00etan hasiko da.

Beraz, Miriam Romatet Zumaiako kultura teknikariak zikloaren aurkezpen ekitaldian nabarmendu zuen bezala «Zumaiako parrokian izugarrizko altxorra dugu; gure organoa. Musikak, bere izaeragatik, nota gutxi batzuen konbinazio amaigabea eskaintzen du, eta organoak, gainera, beste instrumentuen doinuak hurbiltzen dizkigu. Aurtengo jaialdian, bi artista zumaiar izango ditugu: Mari Karmen Azpeitia, organoan, eta Marixi Sesma, klarinetearekin. Harro egoteko beste arrazoi bat».

Zumaiako San Pedro elizako organoa Stoltz anaiek utzitako bitxi bat da. 1890ean egina, estilo erromantiko frantsesekoa da eta 15 erregistro ditu: eskuzko bi teklatu eta pedaleko bat ditu, guztia XVI. mendeko aurreko organoaren kutxa barruan kokatuta. Bere edertasun eta konposizio bereziak moldakortasun harrigarria eskaintzen diete organista profesionalei.