Ekintza ugari antolatu dira Xixili astea ospatzeko

S.U. ZUMAIA.

Azaroak 22 Santa Xixili eguna ospatuko da. Hori dela eta, zenbait ekitaldi izango dira aste osoan zehar, Txori Txiki Musika eta Dantza Eskolak antolatuta. Azaroak 21ean, asteazkena, arratsaldeko 18:00etan entzunaldia izango da komentuan Txori Txikiko ikasleen eskutik. Jarraian, 19:00etan, kalejira bat egingo da herriko kaleetatik zehar Zumaiko bandarekin eta Musika Eskolako ikasleekin. «Kalejira irekia da, beraz, herritarrei parte hartzeko gonbidapena luzatzen diegu hemendik», adierazi dute antolatzaileek. Amaitzeko, azaroak 27an, asteartea, arratsaldeko 18:30ean euskaraldiari zuzendutako jaialdi bat eskainiko da Beheko Plazan. (Eguraldi txarra rekin Aitzuri frontoian).

Bandaren Eguna

Bestetik, Xixiliren aitzakian, hilaren 24an, larunbatean, Bandaren Eguna ospatuko da Zumaian. 12:00etan kalejira hasiko da Musika Eskolatik eta 13:00etan kontzertua eskainiko da Eusebio Gurrutxaga plazan (eguraldi txarra eginez gero Zumaiena Ikastetxeko aretoan egingo da. Hurrengo egunean, hilak 25ean, 10:00etan Txistulari bandaren goiz soinua izango da; 11:00etan meza nagusia parrokian, Beheko Plaza Abesbatzarekin eta eguerdian kalejira.

Amaitzeko, abenduak 1ean, Andra Mari eta San Pedro Abesbatzaren kontzertua izango da, 20:30ean parrokian.

 

Fotos

Vídeos