Dinastia Etxabeko final laurdenetako bigarren jardunaldia, bihar

Julen Egiguren-Uranga eta Jon Alberdi-Zezeaga finalaurrekoetara sailkatu dira

El Diario Vasco
EL DIARIO VASCO ZUMAIA.

Dinastia Etxabe pilota txapelketaren final laurdenetako lehen partidak jokatu ziren astelehenean Aitzurin. Hauek izan ziren emaitzak: gazte-jubenil mailan, Julen Egiguren-Uranga 22-17 Murua-Osa. Eta 23 urtez azpiko mailan, Jon Alberdi-Zezeaga 22-16 Karregal-Cordon (Zubizarreta eta Gaskueren ordez). Beraz, Julen Egiguren-Uranga eta Jon Alberdi-Zezeaga finalaurrekoetara sailkatu diren lehen bikoteak dira.

Gazte jubenil mailan, 3-0, 3-2, 5-2, 5-4, 10-4, 10-6, 13-8, 15-8, 15-13, 17-15, 20-15 eta 22-17 markagailuan, Egiguren-Uranga bikoteak izan zuen partiduaren kontrola, «agintea bere eskuetan izan zuten partida guztian zehar; bi tantora hurreratu bazitzaizkien ere, gerriko urdindunak partidaren bigarren zatian. Julen Egigurenen lan ona aipatu behar besteenaren gainetik», adierazi du Zumaiako Kirol Elkarteko kide den Jexux Iribarrek. Pilota Elkarteko aurrelari azpeitiarrak oso ondo jokatu zuen, serio eta partiduaren erantzukizuna bere gain hartuaz.

Hamahiru tanto egin zituen eta sei galdu. «Iaztik hona, bere jokoak asko egin du gora, joko aldetik batik bat, tanto egiteko baliabide haundiak ikusi genizkion, pilota aurkariak ez dauden lekura bidaltzeko erraztasuna erakutsiz».

Urangak sei pilota galdu zituen. «Ez zuen gaizki jokatu baina hobeto joka dezake. Bi esku onak ditu eta atzelari batek gaur egun hain premiazkoa izaten duen bolea ere bai, baina galdu egin zuen gehitxo, eskumuturrean pilotari behar bezala eutsi gabe kolpea libregi botaz pilota batzuk ihesi joan zitzaizkion», dio Iribarrek. Aurrelariaren bizkarra zaintzen ere gehiago ahalegindu behar dela dio, «honek kinua eginda utzitako pilotak atzeratzeko. Ziur jakingo duela emandako aukera aprobetxatzen dena den ere», gaineratu du.

Muruak lau tanto egin zituen eta lau galdu. «Ez zuen gaizki jokatu baina bere gabeziarik haundiena tantoa egiterako orduan dagoela esango genuke». Osari dagokionez, tanto bakarra egin zituen eta bost galdu. «Ondo jokatu zuen, baina pilota gehitxo galdu ere bai. Iaz aurrelari postuan jokatu zuenak, aurten atzelari bezala jokatu du eta hobeto gure ustez».

23 urtez azpikoen norgehiagokak bi zati izan zituen, «1-1, 2-2, 6-6. 7-7 eta 8-8 berdinduta egon artekoa, non atzelarien arteko lehia gogorra eta estua ikusi genuen eta gero bietako baten beherakada eta 18-7rainoko alde ikaragarria jarraian», azaldu du ZKE-ko kideak. «Hortik aurrerakoa egiteko, lehen ateratako errentaz baliatu ziren Alberdik eta Zezeagak».

Alberdik bost tanto egin eta zazpi galdu zituen. «Ez zuen bere egunik onena izan. Tantoa egiterako orduan ere airez sartzeko ausardia gehiegirik gabe eta galdu berriz askotxo». Zezeagak lau tanto egin eta bost galdu zituen. «Aurreko partiduan bezala, asko eman zion pilotari baina gutxiago galdu. Modu horretan bere jokoak askoz gehiago luzitzen du. Ederra, kantxan nola ibiltzen den eta pilota jotzera nola joaten den ikustea, dantzari bat bezala, ezker-eskubi latz ematen dio pilotari atzekoadroetara erraz luzatuz pilota», dio Iribarrek.

Karregalek bi tanto egin eta zazpi galdu zituen. «Ez zuen gaizki jokatu, defentsan ondo aritu zen, baina tantoa egiteko baliabide gutxitxo ikusi genion aurrekoadroetan».

Amaitzeko, Cordonek azken orduko Gaskueren baja jokatzera etorri zen. Tanto bat egin zuen eta zazpi galdu. «Partidu erdira arte oso ondo egon zen, baina hor beherakada nabarmena izan zuen, bezperan ere jokatuta eta beroagatik agian. Ezin izan zion eutsi Zezeagak jarritako martxari».

Bihar, hilak 9an, final laurdenetako bigarren jardunaldia jokatuko da: Agirremalloa-Erkiaga eta Julen Alberdi-Gartzia gazte jubenil mailan, eta Salaberria-Otaduy-I. Egiguren-Sanchez 23 urtez azpiko mailan.

Itzurungo txapelketa

Astelehenean, Itzurungo pilota txapelketako hirugarren jardunaldia izan zen. Hauek izan ziren emaitzak: Martija-Odriozola 22-16 Etxabe-Unanue; Gorostola-Sasiain 22-10 Saizar-Martin, eta Antia-Oliden 22-Manterola-10 Tumas. Gaur, laugarren jardunaldia izango da 18:00etatik aurrera Larretxoko frontoi txikian. Eguraldi txarra eginez gero, Herri Eskolan egingo da partida.

 

Fotos

Vídeos