Dinastia Etxabe Txapelketaren bigarren jardunaldia, gaur

Txapelketak hasiera polita izan zuen pasa den ostiralean | Lerena-Bikuña eta A. Etxebarria-Uriondo neurtuko dira; jarraian, Elola-Aldabe eta Mata- O. Etxeberria

El Diario Vasco
EL DIARIO VASCO ZUMAIA.

Haisera polita izan du aurtengo Dinastia Etxabe Txapelketak. Hauek izan ziren pasa den ostiralean, Aitzurin, jokatu ziren partiden emaitzak: Zubiria-Arbizu 18- 22 Alberdi-Zezeaga; I. Egiguren-Sanchez 22-19 Elizalde-Irazustabarrena.

«Lehenengo norgehiagokan denetik ikusi genuen, gauz onak eta txarrak ere bai», dio Zumaiako Pilota Elkarteko kide den Jexux Iribarrek. Alberdi eta Zezeagak -7 eta 6-13ko abantailarekin aurretik egon baziren ere, 14-14 berdintzeraino iritsi ziren Zubiria eta Arbizu. «14-18 aldetxoa hartu arren gerriko urdindunak, 17-18 tanto bakarrera jarri ziren berriz ere gerriko gorridunak, baina 17-20 aurreratu berriro eta 18-22ko emaitzarekin aurrera sailkatuak Alberdi eta Zezeaga».

Jon Alberdi Ilunpe Pilota Elkarteko azpeitiarrak sei tanto egin eta hiru galdu zituen. «Partidu askorekin dabil eta ez zuen aparteko dizdirarik erakutsi. Defentsa ona eta aukerako pilotekin tantoa egiten badakila esan genezake». Josu Zezeaga, Olaburu-Iurretako Pilota Elkartetik jokatzen duen Bergarako atzelariak, «tanto bat egin zuen eta bederatzi galdu, hauei esker etorri zelarik hein haundi batean 6-13tik 14-14rainoko berdinketa», dio Iribarrek. «Partidu erdira arte nagusi izan zen atzekoadroetan eta ezker eskubiz pilotakada ederrak jo zituen», gaineratu du.

Xabier Zubiria Zazpi Iturri Pilota Elkartetik jokatzen duen berrobitarrak sei tanto egin zituen eta zortzi galdu. «Ez dira hain emaitza txarrak, baina ez zitzaigun gustatu. Bere jarrera ez zen izan norgehiagoka aurrera atera nahi duen batena». Aaron Arbizu, Irurtzun Pilota Elkarteko Unanuako pilotariak, berriz, tanto bat egin zuen eta sei galdu. «Asko gustatu zitzaigun. Olaizolaren azken orduko baja betetzera etortzeko eskatu eta ez zigun hutsik egin. Kantxan ere majo portatu zela esan behar da», dio.

Bigarren norgehiagoka

Bigarrengo norgehiagoka gogorra eta parekatua izan zen eta markagailuko paradak honen adierazgarri: 0-2, 2-2, 3-2, 3-6, 6-6, 8-6, 8-7, 9-8, 9-9, 10-10, 12-10, 13-11, 17-12, 17-15, 18-17, 21-18 eta 22-19. «Lau pilotariak aritu ziren maila onean, garaileak asko kostata atera zuten aurrera partidua eta galtzaileak berriz lehertuta amore eman behar izan zuten azkenean».

Ioritz Egiguren, Zazpi Iturri Pilota Elkarteko tolosarra, «ohi bezala asko saiatu zela esan behar, eta dituen denak ematen ikusi genuen kantxan». Bere bikotea, Errioxako San Cosme Pilota Elkarteko Jorge Sanchez da. «Azken aldi honetan ia egunero jokatzen ari da eta nabari zitzaion, oso pilotaria da ordea. Ezker eskubi pilota goiko losetan jartzen ahaleginduz eta 'buena' asko eginaz aspertzeko moduan honek pilota galtzeko zain jarriz gero», adierazi du Iribarrek.

«Ugaitz Elizalde, Burlata Pilota Elkarteko Iturengo pilotaria, ere bereak emanda joan zen Zumaiatik». Hamar tanto egin zituen eta sei galdu. «Bere armarik onena ezkerra da eta postura dotorean daki uzten pilota txokoan, naiz airez nahiz botera», dio Zumaiko Pilota Elkarteko kideak.

Aratz Irazuztabarrena Intxure Pilota Elkarteko Alegiko atzelariari dagokionez, «ondo egin zituen bere lanak: hiru egin eta hiru galdu. Atzelari batentzako oso zenbaki onak dira, bai horixe. Egigurenek ateratako sake bortitzei arazorik gabe jakin izan zuen aurre egiten gainera».

Azken final zortzirenak

Bigarren jardunaldia gaur, 22:00etatik aurrera, izango da Aitzurin: Lerena-Bikuña eta A. Etxebarria-Uriondo; Elola-Aldabe eta Mata-O. Etxebarria. Azken final zortzirenak izango dira hauek, 23 urtez azpiko mailan.

Temas

Zumaia

Contenido Patrocinado

Fotos

Vídeos