Zezen erraldoiak San Fermin egunean

Partaidetza. Kale antzerkiak beti izaten du ikuslearen beharra eta partaidetza. Goian Babo Royal ikusleekin, Rodrigo Cuevas Frontoi Txikia girotzen eta hiri-dantza Munoan./
Partaidetza. Kale antzerkiak beti izaten du ikuslearen beharra eta partaidetza. Goian Babo Royal ikusleekin, Rodrigo Cuevas Frontoi Txikia girotzen eta hiri-dantza Munoan.

Kalerkiren emanaldi arrakastatsuenetakoa bihurtu da hirugarren urtez jarraian ospatu ondoren |

JUAN MARI ZUBIAURRE ZARAUTZ.

Kalerki uztaileko lehen hamabostaldian kokatua dagoenez, sarritan, uztailak 7a, San Fermin eguna, egitarauaren barne kokatzen da, Jada, duela hiru urte lehen aldiz etorri ziren Zarautzera Madrilgo Recortauro taldeko kideak, 'Dira dira zezenak dira' izenburua daraman ikuskizunarekin. Zezen puzgarriak arrakasta handia izan zuten eta, dagoeneko, tradizioa bihurtzen ari da. Atzo, arratsaldeko 18:00etan atera ziren Lege Zaharren enparantzan eta entzierro bikaina burutu zuten ehunka lagunen artean, alde zaharreko kaleak jendez betez. Haur eta heldu, benetako entzierro batean murgiltzen dira baina inongo arriskurik gabe eta jolas giroan korrika saioak eginaz. Apustua egin beharko bagenu, datorren urtean ere gurean izango direla aurreratuko genuke.

Beste hainbat emanaldi ere izan dira azken bi egun hauetan eta denetan jende asko ikusi da, garbi erakutsiz Kale Antzerki Topaketak primerako osasuna duela.

Gaur azken saioa

Kalerkiren 25. urteurrena ospatzeko, aurten, Udalak ekoiztutako emanaldi berezia egin dute, Amancay Gaztañagak zuzendua eta Ainhoa Alberdi, Ander Iruretagoiena, Beñat Aristi, Iraia Elias, Koldo Arakistain eta Patxi Santamaria antzezleekin. 'A lurpean' bart gauean estreinatzen zen eta gaur gaueko 23:00etan Arrosategi parkean eskainiko dute. Aurrez, sarrera eskuratu behar dela gogoan izan.

Contenido Patrocinado

Fotos

Vídeos