Zarauzko traineruak Kontxan irabazi zuela 100 urte

Traineruak. Zarauzko portuan lanerako prest. /
Traineruak. Zarauzko portuan lanerako prest.

1918ko irailaren 8an garaipena lortu zuen San Antonio ontziak baina lortutako abantaila kendu egin zioten

JUAN MARI ZUBIAURRE ZARAUTZ.

Joan den asteburuan Kontxako estropada lehiatu zen eta arraun zaleen atentzioa Donostiako badian jarrita egon zen. Baina agian askok ez dakitena zera da, larunbatean, irailak 8an, ehun urte betetzen zirela Zarauzko traineruak toki berean garaipena lortu zuela.

Orduan ere Kontxako bandera bi asteburutan lehiatzen zen. Lehenengoan lau traineru ziren borrokan, San Antonio (Zarautz), Aingira (Pasaia), Koruko Amabirjina (Donostia) eta Elcano (Getaria). Zarauztarren ontzian Juan Angel Lazcano patroi zutelarik arraunean herritar hauek lehiatu zuten, Nicolas Alcorta, Santos Leunda, Julian Arruabarrena, Feliz Urbieta, Santiago Aizpurua, Mateo Lazcano, Eusebio Aizpurua, Francisco Achucarro, Juan Diez, Juan Jose Zulaica, Donato Larrañaga, Patxi Zubiaurre eta Genaro Alcorta.

Orduan ere epaileen erabakiak aurtengoan bezala zer esana eman zuten. Gertatutakoa labur bilduta hau izan zen; Donostiako trainerua aurretik omen zen eta ziaboga ematerakoan Getariako traineruarekin jo zuten. Bi ontziak gelditu eta zarauztarrak euren lanean jarraitu zuten eta etxekoak ahalegin handiak egin arren ezin San Antonio traineruari aurrea hartu eta garaipena Zarauzko ontziarentzat izan zen.

Garaipen handia izan zen hura eta gerora ere ontzian zeuden arraunlariak gogoan zuten han gertatutakoa, honela gogoratzen du gaur egun ere Felipek, Patxi Zubiaurreren semeak 95 urterekin, «injustizia izan dek gurekin egindakoa esaten zuen gure aitak, guk irabazi, zer ikusirik izan ez eta zigorra jaso behar». Ez da harritzekoa orduko zarauztarren haserrea zeren hurrengo iganderako epaileek erabaki bitxia hartu zuten. Lehen eguneko garaipena eta orduko 1.500 pezeta zarauztarrentzat izan ziren, 20 minutu eta 4 segundoko denborarekin. Baina bigarren asteburura begira, aurretik lortutako diferentzia ez zela kontutan izango erabaki zuten, Donostiarrak Getariako ontziarekin izandako istripuan errurik ez omen zuten izan eta horregatik biak denbora berdinarekin atera behar zutela iritzi zioten.

Emaitza gero badakigu. Donostiarrak nagusitu ziren bigarren asteburuan baina zarauztarrak inori kalterik egin gabe euren lana txukun egin arren kaltetuak izan ziren eta hori hor geratuko da betirako.

Contenido Patrocinado

Fotos

Vídeos