Urko Zumeta: «Ilusio handiz noa Biarritzera, aukera aprobetxatzen saiatuko naiz»

Urko Zumeta, 17 urteko gazte zarauztarra, Biarritz Olympique taldeak fitxatu berri du./ETXEBERRIA
Urko Zumeta, 17 urteko gazte zarauztarra, Biarritz Olympique taldeak fitxatu berri du. / ETXEBERRIA

Astelehenean hasten ditu entrenamenduak. Lehen denboraldia jubenil mailan egingo du eta, bigarrena, 21 urte azpiko taldean

ANTXON ETXEBERRIAZARAUTZ.

Urko Zumeta Aizpuruak, 17 urteko gazteak, datorren denboraldian Biarritz Olympique taldean jokatuko du. Orain arte, Babyauto Zarautz jubenilen taldean aritu da. Oraindik ere, beste urtebete geratzen zaio jubenil mailan eta berau Biarritzen jokatuko du, Biarritz Olympique Pays Basque rugby taldean. Entrenamenduak astelehenean bertan hasiko dituzte. Zarauztik hain gazte inor ez da joan maila honelako talde batera. Urko itxaropentsu doa, rugbian formakuntza egitera eta duen guztia ematera, ikasketak alde batera utzi gabe.

-Nolatan deitu dizute Biarritzetik?

-Nik Zarautzen jokatzen nuen, 18 urte azpiko taldean, eta Euskadiko selekzioarekin ere jokatu izan dut. Horretan, Biarrizkoek ikusi ninduten jokatzen, nirekin eta direktibarekin hitz egin zuten eta, ondo pentsatu ondoren, erabakia hartu nuen. Animatu egin naiz urtea Frantziako jubenil Ligan jokatzera. Orain, 17 urte ditut, datorren urteko martxoan egingo ditut 18, eta aukera ona iruditu zait Biarritzekin fitxatzea. Gainera, ikasketarik ez dut galtzen. Bigarren batxilergoa bertan egingo dut; esperientzia aberasgarria izan daitekeela pentsatzen dut.

-Noiz hasten duzue denboraldia?

-Denboraldi-aurrea entrenamenduekin astelehen honetan bertan, eta irrikaz nago nire taldekideak ezagutzeko.

-Biarritz Olympique Pays Basque talde profesionala izanik, zer kontratu egin dizute?

-Denboraldia 18 urte azpiko taldean emango dut. Etxe bat jartzen digute zelaiaren ondoan eta ikasketak eta gastu guztiak ordaindu. Bilboko jokalari batekin, Madrilgo beste batekin (hau zaharragoa) eta georgiano batekin biziko naiz lehen urte honetan. Gero, gauzak ondo badoaz, bigarren urtea 21 urte taldean jokatuko nuke. Lehen taldera hoberenak bakarrik iristen dira, oso zaila izango da, baina, nork daki, gogo handiz noa.

-Lehen urte hau orduan, formakuntza taldean emango duzu?

-Halaxe da, lehen urtea formakuntza taldean jokatuko dut. Ez da ohikoa hain gazte hartzea, baina hara noa jokalari bezala urrats berri bat ematera. Jubenil mailan Frantzian lau talde daude eta, ondoren, hoberenak azken faserako sailkatzen dira.

-Zein postutan jokatzen duzu?

-Hirugarren lerroan, 8 bezala.

-Zarautzen denboraldi bikaina burutu duzue.

-Bi urte jarraian, Espainiako Txapelketan sailkatu gara, Espainiako 8 onenen artean. Talde ona dago, eta aurten ere ona izango da, asko jubenilen lehen urtekoak ginen.

-Eta frantsesarekin nola moldatzen zara?

-Astelehenetik aurrera, astean hirutan, ordu eta erdiko klaseak ditut. Ea lehenbailehen ikasten hasten naizen, taldeko jokalari gehienak frantsesak dira.

Contenido Patrocinado

Fotos

Vídeos