SKAPA 2018 gaur hasiko da

Fan&Go. Zarauztar taldeak itxiko du aurtengo SKAPAko gau kontzertu zerrenda. / AMAXKAR
Fan&Go. Zarauztar taldeak itxiko du aurtengo SKAPAko gau kontzertu zerrenda. / AMAXKAR

Santa Klara, Azken Portu eta Aritzbataldeko jaiak gaurtik igandera luzatuko dira |

JUAN MARI ZUBIAURRE ZARAUTZ.

Oraindik gogoan dituzte herritar askok joan den urteko abuztuko irudiak. Santa Klara, Azken Portu eta Aritzbataldeko jaiak bertan behera geratu zirenekoak. Mobilizazio ikusgarria eragin zuen egoera ez ohiko horrek eta hausnarketarako tartea zabaldu.

Urtebete igaro ondoren, egoera berriz bideratuta dagoela dirudi eta gaurtik igandera bitartean festa giroa nagusitu beharko luke Zarauzko auzo jendetsu honetan. Joan den larunbatean ekin zioten mus txapelketarekin eta aurrez bestelako ekimenak burutu ditu Komisiyuak, denak arrakastatsuak.

Orain festa egitarauari ekingo zaio eta lehendabizi gazteen eguna ospatuko dute. Goizeko 10:00etatik 14:00etara haurrentzat puzgarriak egongo dira plaza gorrian. 12:00etan komisiokideen arteko pilota partida, eta arratsaldeko 16:00etan suziria jaiak iragartzeko. Jarraian, buruhandiak 'Goizeko ihintza' txistularien laguntzarekin.

16:30 inguruan ume jolasak egingo dira Tentenea plazan eta 18:00etan hasita, Azken Portuko auzo krossa plaza gorrian. Hiru mailetan banatuta aterako dira, 5 urte arte (ez da irabazlerik egongo eta parte hartzea bultzatuko da), 6 eta 9 urte bitartekoak eta azkenik 10 eta 14 urte bitartekoak. Partaideen artean Arrivatiko izozkiak banatuko dira.

19:00etan Jalgi taldearen dantza erakustaldia plaza gorrian (Sagazti plaza) eta ondoren 19:30ean txokolatada gozozale guztientzat. Gaueko 21:30ean Joxe Mari Artetxeren omenezko XXVII. gau txirrindularitza kriteriuma. Kadete eta jubenilak lehiatuko dute proba ezberdinetan, neska eta mutilak. Gauetako kontzertuak Glaukoma taldeak zabalduko ditu, 23:30ean hasi eta 00:45 bitartean eta ondoren Tremenda Jauria taldea 2:30ak bitartean.

Bihar larunbata Santa Klara eguna ospatuko da. 'Goizeko Ihintza' txistulariak eta suziriak irekiko dute eguna eta buruhandiak 10:00etan aterako dira. Ordu berean Meza Nagusia Frantziskotarren elizan (bi hizkuntzetan). 10:30ean ekingo zaio marrazki lehiaketari eta eguerdian auzoko jubilatuentzat hamabietakoa Urpekoak elkartean. 17:30ean zumba Vanesa Ocamposen eskutik Urdaneta plazan. 18:30ean parrillada plaza gorrian. Arratsaldeko 19:00etan, herri kirol jaialdia eta gaueko kontzertuetan Blue Beans irekitzeko, Capsula jarraitzeko eta amaiera emateko Elektropeña eta Gertrudis DJak (mozorrotuta joatea gomendatzen da).

Igandean, festen azken eguna, 9:00etan txistulariak, trikitilariak eta suziriak zabalduko dute eguna. 10:30ean Patxi Iruretagoienaren omenezko IV. Marmitako Txapelketa abiatuko da plaza gorrian. 11:30ean Joxe Aranbururen omenezko XI. Toka Txapelketa eta umeentzat xakela txapelketa. Eguerdian, 12:30ean, patata tortilla eta postre lehiaketak egingo dira, eta bitartean epaimahai batek auzoko balkoirik ederrena hautatuko du. 14:00etarako marmitakoak eraman behar dira eta 15:00etan auzo bazkariari ekingo zaio. Gaueko 22:00etan bertso saioa, Sustrai Colina, Maialen Lujanbio, Nerea Ibarzabal, Aitor Sarriegi eta Unai Agirre. Festak bukatzeko, herriko musika talde bat egongo da gauerditik aurrera, Fan&Go erromeria taldea Skapa 2018a agurtzeko.

Temas

Jaiak
 

Fotos

Vídeos