Zarautz

Sagardo eguna igande honetan ospatuko da, hainbat ekitaldirekin

Orain hiru aste ospatzekoa zen Sagardo Eguna bertan behera geratu ondoren eguraldi txarrarengatik, Zurekin elkarteak antolatzen duen Zarauzko Sagardo Eguna igande honetan, otsailaren 23an ospatuko da. Ekitaldi honen bidez, ostalariek ongietorria emango diote aurtengo txotx sasoiari. Eguna ekitaldi ugariek beteko dute, hauen artean, musika, bertsoak Motxian bertso eskolaren eskutik eta txistulariak Goizeko Ihintza elkartearekin. Familien txokoa ere izango da, txikiak disfrutatu dezaten eskulanekin eta joko desberdinekin.

Gerturatzen direnek, 12euroko txotx batekin, sagardo berriaren dastaketa, txuleta pintxoa eta kopa bat eskuratuko dituzte eta horrela sagardogile guztien sagardoak dastatu ahal izango dituzte. Euskal Parrilla izango da bertan txuleta pintxoak parrillan egiten. Berrerabilpena sustatzeko, kopa bueltatzen duenari 2 eurositzuliko zaizkio.

Igandeko festan zortzi sagardogilek hartuko dute parte: Aburuza (Aduna), Altuna (Urnieta), Ekain (Zestoa), Izeta (Aia), Lizeaga eta Petritegi (Astigarraga), Satxota (Aia) eta Urdaira (Usurbil).

Ekitaldia Iñigo Intxauspe eta Helena Pedrosa ostalariei eskainiko zaien omenaldiarekin zabalduko da.