Zarautz

Prebentzioaz eta lehen sorospenez ikasteko aukera goizean malekoian

Zingira Zarautz Babes Zibilak antolatu du gaur egingo den 'Guztion eskuetan' izeneko kanpaina. Herritar ororentzako prebentziorako eta lehen sorospenerako teknikak irakatsiko dituzte gaur, 10:00etatik 13:00etara, malekoian.

Kanpaina honen asmoa, herritarrei larrialdi edo estutasun egoera baten aurrean nola jokatu erakustea da. Aurreko aldietan bezala, aurtengoan ere larrialdietako sektoreko hainbat elkartek eta erakundek parte hartuko dute ekimenean: hala nola Dyak, Osakidetzak, SOS Deiakek, Ertzaintzak, Suhiltzaileek eta Udaltzaingoak.

Hori horrela, 10:00etatik eguerdiko 13:00etara artean, larrialdietan diharduten langileek euren egunerokoa erakutsiko dute malekoian jarriko dituzten karpetan. Besteak beste, bertan ikusi ahal izango dira anbulantzien eta suhiltzaileen saioak, BBB (bihotz-biriketako bizkortzea) eta desfibriladore formakuntzak edota erreskatatze simulazioak. Gainera, 12:00etan, bizikleta istripu baten simulazioa ere egingo dute.