Ongizate fisikoa eta emozionala sustatzeko tailer berriak

Parte hartzeko interesa duen pertsona orok hilaren 21a baino lehen eman beharko du izena Prebentzio arloan

J. M. ZUBIAURRE ZARAUTZ.

Zarauzko Udaleko Gizarte Zerbitzuetako Prebentzio arloak ongizate fisikoa eta emozionala sustatzeko tailer berriak antolatu ditu 2019 urteko lehen hiruhilekorako. Miren Letamendia, Osasun eta Prebentzio zinegotziak, tailer hauek eskaintzearen helburu nagusia osasunaren sustapena dela gogorarazi du, «osasunaren sustapena ikuspegi zabalean ulertzen dugu Prebentzio sailetik. Osasunaz hitz egiten dugunean osasun fisikoari eta emozionalari buruz ari gara. Tailer hauen bidez zarauztarrei ezagutza, trebetasunak, gaitasunak, baliabideak eta tresnak eskaini nahi dizkiegu ongizaterako eta egoera emozionalak hobe- tzeko. Horrez gain, tailer hauek elkarren artean gauzak parteka- tzeko, hobeto sentitzeko eta irtenbideak aurkitzeko guneak izango dira».

Plazak mugatuak

Hala, bi ikastaro berri eskainiko dira datozen hilabeteetan. Lehena, 'Haur masajea' izenekoa izango da. Letamendiak azaldu duenez, «haur masajea teknika goxo eta atsegina da, eta, ukimenaren bitartez, haurraren gorputza eta emozioen munduarekin bat egitea ahalbidetzen du, modu sakonean. Begiraden, irribarreen, kontaktuaren, hitzen eta jokoaren bidez komunikatzearen arte hau lantzen ikasiko dugu tailer hauetan».

Ikastaroa praktikoa izango da; hau da, gurasoek beren haurrei masajea emango diete, irakasleak panpina baten bidez gorputz atal bakoitzaren teknikak pausoz pauso adierazten dituen bitartean. Tailerra Nerea Mendizabalek eskainiko du, euskaraz, Zuberoa kalea 22 zenbakian dagoen ikastaro gelan. Saioak ondoko egunetan izango dira: urtarrilak 29 eta 31, eta otsailak 7, 12 eta 14. Ordutegiari dagokionez, 10:00etatik 12:00etara eskainiko dira. Matrikularen prezioa 15 eurokoa da eta 8-10 pertsona inguruko taldea osatu beharko da. Gurasoek bat edo biek hartu dezakete parte.

Bigarren tailerra 'Haurren haserrealdiak eta beste emozioen kudeaketa eta akonpainamendua' izenekoa izango da. «Haurrak dauden tokian beti bada jolasa eta algara, baina kasketaldiren bat edo beste ere izaten da. Hau gertatzen denean, beren burua lurrera botatzen dute, ostikoka, negarrez eta oihuka, etxean naiz kalean. Egoera hauek nola kudeatu ikasiko dugu tailer honetan», azaldu du Osasun eta Prebentzio zinegotziak, Miren Letamendia.

Tailer honetako irakaslea Mireia Centeno psikologoa izango da eta euskaraz eskainiko da. Taldea asteazkenetan elkartuko da Zuberoa kalea 22 zenbakiko ikastaro gelan; zehazki, otsailak 20 eta 27an eta martxoak 6 eta 13an. Saioak 17:30etik 19:00etara izango dira. Kasu honetan, gutxienez 10 pertsona eta gehienez 16 pertsonako taldea osatu beharko da ikastaroa aurrera ateratzeko eta matrikularen prezioa 10 eurokoa izango da.

Parte hartzeko interesa duen pertsona orok urtarrilaren 21a baino lehen egin beharko du, e-posta bidez, prebentzioa@zarautz.eus helbide elektronikora mezu bat bidaliz. Plazak mugatuak direnez, zozketa egingo da izena eman dutenen artean eta Zarautzen bizi diren pertsonek lehentasuna izango dute.

Era berean, ikastaroa egiteko gutxieneko pertsona kopuru bat egon beharko du izena emanda, eta, hala ez balitz, ikastaroa bertan behera geldituko litzateke. Informazio gehiagorako, https://prebentzioa.wordpress.com/ongizate-fisikoa-eta-emozionala-sustatzeko-tailerrak/ web orrialdean eskuratu daiteke edo 943005127 telefono zenbakira deitu.