Kilometroak 2019 festa antolatzeko lekukoa hartu du Ikastolak

Belen Murua eta Iñigo Ameztoi, igandean Zumarraga-Urretxuko ordezkarien eskutik lekukoa hartzen. / JOSE MARI LÓPEZ
Belen Murua eta Iñigo Ameztoi, igandean Zumarraga-Urretxuko ordezkarien eskutik lekukoa hartzen. / JOSE MARI LÓPEZ

Zarautzek hirugarren aldiz antolatuko du Gipuzkoako ikastolen jaia | Datorren urteko festa erraldoia herrian izango da, urriaren 6an, eta dagoeneko lan taldeak martxan dira

ANTXON ETXEBERRIA ZARAUTZ.

Zarauzko ikastolak hartu du Kilometroak-en lekukoa. Iñigo Ameztoi, Zarauzko Salbatore Mitxelena ikastolako lehendakariak, eta Belen Murua, zuzendariak, hartu zuten igandean Zumarraga-Urretxuko ordezkarien eskutik lekukoa. 1977an Beasainen abiatutako Kilometroaken ekimena eskuz esku pasatzen joan da, eta eredu honetako azkena antolatzearen ardura Zarauzko ikastolarena izango da.

Ameztoik esker onez hartu zuen lekukoa, gogoan edukiz molde honetako azkena dela, eta zikloa «borobiltzea» hartu du erronka gisa. Duela mende erdi sortu zen ikastola, euskara ardatz hartuta, eredu pedagokiko aurrerakoi eta apur-tzaile batekin. Bigarren irauli bat eman nahi dio eredu pedagogikoari. Buru belarri daude ikastolako profesionalak horretan lanean, eta 2019ko Kilometroetan biltzen dena pedagogia berrian inbertitzeko baliatuko da. «Iraultzaile izan nahi dugu», esan zuen Ameztoik, oinak lurrean, aurrera begira aitzindari izaten segitzeko helburuarekin.

Azpimarratu zuen euskararekin eta Euskal Herriarekin konpromiso sendoa duela ikastolak, gonbidapena luzatuz: «Datorren urriaren 6an denok gonbidatuta zaudete Zarautzera». Antton Mendizabal artistak propio Kilometroetarako ondutako lekukoa hartzen joan dira 1996tik Gipuzkoako ikastoletako ordezkariak, harian-harian, festa antolatzea egokitzen zitzaionaren arabera. Orduz, geroztik lekukoa jaso duten ikastolen izenak grabatuta ditu egurrezko artelanak.

Zarautzek hirugarren aldiz antolatuko du Gipuzkoako ikastolen jaia. Lehen aldiz, 1987. urtean antolatu zuen; bigarrena, 2004an, Oriorekin batera; eta hirugarrenez, 2019an antolatuko du datorren urtean. Ofizialki, lekukoa igandean hartu badute ere, dagoeneko martxan jarrita daude lantaldeak lanean. Ehun pertsonatik gora hasita daude lanean, euskararen aldeko festa handi hau, eredu honetako azkena, borobila izan dadin guztiontzat.

Contenido Patrocinado

Fotos

Vídeos