'Hondartza hartu' ekimena burutuko da datorren larunbatean

Aurreko urteetan Tropela Hondartzan ekimena ospatu izan da. Aurten, 'Hondartza hartu'. / ETXEBERRIA
Aurreko urteetan Tropela Hondartzan ekimena ospatu izan da. Aurten, 'Hondartza hartu'. / ETXEBERRIA

Kilometroak urrian Zarautzen ospatuko dela eta, Ikastolak herriko eragileekin batera antolatutako festa

ANTXON ETXEBERRIAZARAUTZ.

2019ko Kilometroak Zarautzen ospatuko dira, urriaren 6an. Mugarri horren harira, hainbat ekimen antolatu dituzte, beti ere, aurten kilometroetarako finkatutako helburuei eutsita.

Ikastola herritik sortu zen, eta herriarentzat. Helburu horri helduta sortu da 'Hondartza hartu' ekimena. Herriko eragileekin batera elkarlanean ondutako egitaraua osatu dute ekainaren 15erako. Salbatore Mitxelena Ikastolaz gain, Ikastolen Elkartea, Tropela, Artezaleak, Zelai Ondoko Jai Batzordea, SKAPA, Vista Alegreko Jai Batzordea, Hiruerreketa Auzo Elkartea, Pagoeta Mendizale Elkartea, Arkamurka, Bilgune Feminista, Arraio Irratia, Shelter, Zarauzko Surf Elkartea eta hondarrarekin artelanak osatzen adituak diren zenbait artista aritu dira proposamena borobiltzen, besteak beste.

Egitarau zabala prestatu da, goizeko 09:00etatik aurrera. Besteak beste, Tai-Chi saioa egongo da, Garikoitz Larrañagaren eskutik. Surf ikastaroak, 5 euroren truke. Derrigorrezkoa da aldez aurretik izena ematea. Txanda bakoitzean 18 pertsona izango dira gehienez eta izena emateko ordena errespetatuko da taldeak osatzerako orduan. Beraz, arin ibili!

Horretaz gain, Tropela Hondartzan (ziklistatxoak eta kanikak eraman) egongo da; marrazketa gunea Artezaleak-en eskutik; Hondar Artea, Juanjo Gurrea, Goretti Aranburu eta Pako Serrasen eskutik; kometak eta petanka Pagoeta Mendizale Elkartearen eskutik (kometak edota petanka bolak eraman); eta hondarrezko irudien tailerra, Artezaleakeko Andoni Bastarrikaren eskutik (kuboa eta pala behar dira).

Aureko urteetan Tropela Hondartzan eguna ospatzen zen, zirkuitoak egin eta ziklistatxo eta kanikekin, garai batean bezala, lasterketak eginaz. Oso harrera ona izan ohi zuen, jende ugari hurbildu izaten zelarik. Aurtengoan festa osatuagoa da, ikusi daitekeen bezala, denetatik izango da, herriko elkarte desberdinak animatu dira 'Hondartza hartu' ekimenerako bere aletxoa jartzen. Ea ba, herritarren eta bisitarien erantzuna ere alturakoa izaten duen.

Era berean, goiz osoan zehar erronka jarriko dute: 'Zenbat mikroplastiko aurkituko dugu gure hondartzan?'. Getariko antxoak egongo dira malekoian, Galtxagorri parean egongo den parrilan, eta makarroiak eta txorizoa ere bai txosnan. Arraio Irratiak egingo du zuzeneko kontakizuna. Eta egunaren amaieran parte hartzaileen artean izozkiak banatuko dira.