ZKE Halterofilia ez da finalera sailkatu

Lehiaketa. Aritzbatalden saio bikaina ikusi zen eta antolakuntza zoriondu egin zuten. Epaile lanetan, Ricardo Oyarzabal. / AMAXKAR
Lehiaketa. Aritzbatalden saio bikaina ikusi zen eta antolakuntza zoriondu egin zuten. Epaile lanetan, Ricardo Oyarzabal. / AMAXKAR

Liga Nazionaleko azken jardunaldia lehiatu zen Aritzbatalde pilotalekuan | Elkartearen omenaldia jaso zuten Oyarzabal, Kortajarena eta Mendizabalek

JUAN MARI ZUBIAURRE ZARAUTZ.

Zarauzko Kirol Elkarteko 75. urteurrenaren ekintzen barruan eta ZKE halterofilia saileko 50. urteurrenaren barne antolatu zen Liga Nazionaleko 5. jardunaldia joan den larunbatean, Errege eta Erregina kopen finalerako sailkapenerako play-offa.

Finala azaroak 10ean Madrilen izango da. Bertan, Espainiako 12 talde izango dira lehian. Larunbat honetan beste 7 tokitan ere izan ziren txapelketak: Camas (Sevilla), Alzira (Valentzia), Molins de Rei (Barcelona), A Coruña (Galizia), Madrid, San Cristobal de La Laguna (Kanariar irlak) eta Melilla. Zarauzko saioa Aritzbatalde pilotalekuan egin zen.

Zarautzen 6 talde ziren lehia-tzekoak: Helios (Zaragoza), Queiron (Iruña), Indarra (Gasteiz), Danok Danena mutilak eta neskak (Zizurkil), eta ZKE halterofilia (Zarautz), baina 3 bakarrik jardun ziren: Helios (Zaragoza), Queiron (Iruña), eta Zarautz. Denera, 18 kirolari bi txandatan banatuta. Txapelketa ikusgai izan zen zuzenean LaLiga 4 Sports bidez.

Jardunaldia hasi zuten hiru lehen taldeak sailkapenean hauek ziren: lehenengo Club Halterofilia Coruña A 8.150,71 punturekin, bigarren Escuela Tinerfeña de Halterofilia A 8.115,86 punturekin, eta hirugarren LPV Melilla A 7.939,25 punturekin.

ZKE halterofilia aurtengoan 16. postuan dago 4 jardunaldi ospatu ondoren. Azken bi urteetan finalera sailkatzea lortu duen arren, aurtengoan ez da posible izan. Zara- uztarrek baja batzuk izan dituzte eta taldea ondorengoek osatu zuten, lehenengo txandan; Borja Bravo, Danel Lopez eta Jaizki Mendizabal, eta bigarren txandan; Aitor Gabirondo, Ibon Eguzkiza eta Jon Mendizabal. Entrenatzaileak Enrike Kortajarena eta Juan Mendizabal izan zituzten.

Behinbetiko sailkapena Federazioak aste honetan zehar argitaratuko duen arren, ZKE halterofilia ez da lehen 12 postuetan izango, azkenik eta ezbehar baten medioz, 5 kirolariren puntuaketa bakarrik izan baitzuten.

Txapelketaren antolakuntzagatik zoriondua izan zen ZKE halterofilia. Etorritako taldea, eta Burgosetik etorritako superbisoreak, Manolo Garciak, zarauztarren antolakuntza txalotu zuten. Epaile Zara- uztarrak hauek izan ziren larunbateko saioan: Ricardo Oyarzabal, Shanti Buenetxea, Jose Ignacio Zulaika, Jose Manuel Veig eta Enara Mendizabal.

ZKE halterofiliako 50. urteurreneko leloa '50 urtez Zarautz altxa- tzen' ezarri diote. Honen barne, ZKE halterofilia sortutakoan zeuden gaztetako hiru, txapelketan izan ziren: entrenatzaileak, Enrike Kortajarena, eta Juan Mendizabal eta epailea, Ricardo Oyarzabal. Hirurek omenaldi txiki bat jaso zuten, Ainhoa Kortajarena eta Enara Mendizabalek dantzatutako Agurraren bitartez. Gainera, egungo Zarauzko Kirol Elkarteko lehendakariak, Esteban Collantes, eta aurreko lehendakariak, Juan Mari Arrizabalaga, Juan Mendizabal eta Enrike Kortajarenari txapela bana oparitu zizkieten, 50. urte ondoren ZKE halterofilian egunerokotasunean lanean jarduteagatik gaur egun ere.

Contenido Patrocinado

Fotos

Vídeos