«Gizonak animatu nahi ditugu parte hartzera»

TOKA taldeko Asier Baglietok eskerrak eman zizkien Zarauzko Udaleko berdintasun sailari eta Zarauzko mugimendu feministari. «Haien ekimenez abiatu baitzen duela 10 urte orain martxan jarriko dugun lantegiaren pareko bat, eta han egindako lanari esker sortu genuen TOKA Zarauzko gizon taldea. Baita berdintasun kontseiluari, haien eskariz posible baita orain Zarauzko Udalarekin abiatzen ari garen elkarlan hau».

Baglietok gogoratu zuen lehen lantegi hartan 12 gizonek hartu zutela parte eta urte eta erdiko prozesuaren ondoren, «gure kasa TOKA taldea antolatu eta lanean jarraitzea erabaki genuen». Ordutik hamaika izan dira TOKA taldean parte hartu duten gizonak, «hainbat zarauztarrak eta beste hainbat inguruetatik etorriak».

Baglietoren esaneta, «argi» dute gizon askok «gure baitara lana egiteko premia dugula, jaso dugun heziketak gerora, jasotako hori errepikatzera eraman ez gaitzan. Eta horretan jardun gara urteotan taldean parte hartu dugun gizonak, jasotakoa deseraikitzen, eta benetan parekidea izango den gizarte horretan gure tokia zein izango litzatekeen eraiki nahian». Emakumeek bere bidea hasita, «gizonok bai edo bai errealitate berrira egokitu beharra izango baitugu».

TOKAko taldekideek argi dute nahi gabe, «hain barneratuak ditugun egiteko moduak, gure diskurtsoarekin eta pentsatzen ditugun ideiekin kontraesanean daudenak asko eta asko, lantzeko premia dugu gizonok. Ahaldundu behar gara gabeziak ditugun gaiotan, hasteko guretzat gizon bezala jator bizitzeko, behar beharrezko zaigulako eta ondoren, guztiontzat hobea izango delako, zalantzarik gabe».

Amaitzeko, Baglietok nabarmendu zuen kontraesan horiek lantzeko «garrantzitsua» dela «gizonontzat toki seguru eta intimoak sortzea, epairik gabeak, gizon guztiak ongi etorriak sentituko diren espazioak. Eta halakoxea nahi dugu izatea sortu nahi dugun lantegia».

Contenido Patrocinado

Fotos

Vídeos